إنتبه على تواير سيارتك وإفحصها من وقت الى آخر

تاير سيارتي

هذي صورة تاير من تواير سيارتي وقد تلف بشكل كامل مع انه مازال نوعا ما جديد !! والحمد لله اني بالصدفة شاهدته فبل ان ينفجر علي وانا اقود السيارة وخصوصا في السرعات العالية

كما تلاحظون في الصورة اعلاه ان السيم قد ظهر من التاير بشكل مخيف وقريب جدا الى الإنفجار ، والجهة التالفة من التاير كانت لا تظهر اطلاقا لأنها كانت من الداخل بسبب اختلاف في الميزان التواير او مثل ما نقول عليها ( السحكية ) للتواير والتي لا اعرف كيف حصلت ؟

انا وقعت على المشكلة قبل حصولها لا سمح الله بالصدفة والفضل يعود الى ( قطة ) كانت تختبئ تحت السيارة وحاولت اخافتها وعندها شاهدت التواير الأمامية كما في الصورة فوق !! وبدون تردد على طول ذهبت الى تبديل التواير وعمل الميزان المناسب للهيئة حتى لا تحصل نفس هذي المشكلة مستقبلا .

نصيحتي لك !! قم بفحص التواير بشكل دقيق خصوصا من الداخل لأن التاير قد يظهر لك انه سليم ولكن في الحقيقة فهو على وشك احداث مشكلة كبيرة لا سمح الله كما شاهدتم في طريقة تلف التواير في سيارتي ، الله يحفظكم من كل شر

هذي بعض الصور بعد ان قمت بتبديل التواير والبدأ في عمل الميزان والسحكية للتواير بالكامل

رفع السيارة لعمل الميزان والسحكية

تركيب اجهزة لعمل الميزان للتواير

ميزان التواير

‫3 تعليقات

  1. يوم ابدل الزيت بالوكاله يشيكون على السيارة كلها ولو فيها شي جان قالولي بس هم راح اشيك على توايري

    شكرا لك اخوي هورنت على التنبيه والله يحفظك

  2. الصورة تخرع يا هورنت! خلني اشيك على جيبي!
    بس شنو نوع توايرك ؟

    بس اعتقد ان المشكله مثل ما قلت مو بالتواير بل بالسحكيه الظاهر احد حاك الرصيف بالشفر او يمكن صاحب المحل ما عمل ميزانيه زين

    انا ايام سيارتي الجالنت و الكونكورد كل ما احك الرصيف على طول اروح الشويخ اسوي سحكيه! لأن اولاً السياره احس فيها تلف وما تمشي سيده

    جيبي البليزر ياما حكيت رصيف وما يحتاج اسويله سحكيه يستحمل صدمات اكثر من الصالون وتوايري دنلوب سافرت فيه الخـُـبَر