إشتكي لأن بعض الناس ما تمشي إلا بالشكوى

لأكثر من عام ونصف وأنا اشاهد هذا الإيميل بشكل علني وفاضح والذي يتواجد ( تماما ) امام باب ثانوية بنات ، وبنفس الوقت يطل على شارع عام مزدحم دائما بالمارة ، الإيميل يظهر بشكل واضح جدا للكل ، الشرهة على مديرة المدرسة من عدم قيامها بإتخاذ الازم من زمان ،، وقلت لنفسي ليش ما اشتكي؟ وخلونا نشوف شنو الي راح يصير

اليوم قدمت شكوى ( بالهاتف ) على هذا الرقم 25435024 والرقم الداخلي 101 لمساعدة مدير المنطقة التعليمية أخبرها بالموضوع الي تشاهدونه بالصورة في الأعلى لثانوية برقان للبنات ، كما تشاهدون في الصورة ان الموضوع فيه تقاعس كبير من مديرة الثانوية خصوصا انها ثانوية بنات وايضا لسبب ان الإيميل هذا موجود من العام الدراسي السابق والآن نحن على وشك الإنتهاء من العام الدراسي !! اي سنتين بدون اي تحرك من مديرة المدرسة ( او ) من اولياء امور الطالبات ( او ) من سكان البيوت المقابلة لهذي الثانوية !

كم بنت قام صاحب هذا الإيميل بالضحك عليها ؟ او خرب بيتها وعلاقتها مع اهلها ؟ دون تحرك من قبل إدارة هذي المدرسة او اولياء امور البنات مع الأسف

إن لم اتحرك انا او غيري بتقديم الشكوى فلن تقوم مديرة المدرسة بعمل الازم !! نعم وسبب قناعتي التامة هي المدة الطويلة التي ذكرتها لكم ، ( إن ) كانت هنالك فعلا شكاوي قد تم تقديمها من قبل ولم يتم عمل الازم فيجب محاسبة المديرة لأنها غير مبالية وخصوصا انها مسؤلة عن بنات في قمة الطيش والمراهقة !! انا موضوعي من هذي الشكوى المصلحة العامة وخصوصا اني أب لأربعة بنات في المرحلة الإبتدائية ! ومستقبلا حتما سيذهبون لهذي او لأي ثانوية مجاورة إن شاء الله  ، وسيتم متابعة الموضوع إن لم يتم اتخاذ الإجراء الازم ، وستكون وقتها شكوى رسمية بالصور للوزارة نفسها لو لزم الأمر

اعتقد ان مديرة المدرسة لا يهمها الأمر لأن مظلة سيارتها دائما فاضي لها لكي يظلل سيارتها الغالية ، ومكتبها دائما يتوفر فيه الشاي والقهوة والتكيف البارد ، ليش تتعب نفسها للنظر لأمور مهمة لغيرها ؟

سيتم تحديث الموضوع في حال إصلاح الأمر من قبل هذي المديرة إن شاء الله

وفي نهاية موضوعي ( لا تسكت ) اخي القارئ عن الغلط !! لأن في ناس ما تمشي صح إلا بالشكوى مع الأسف

‫16 تعليقات

  1. اخي العزيز ماكو الا حل واحد تطرش واحد من ربعك او اخوك الصغير وتعطيه صبغ رش لونه ابيض من لوازم العائلة ويصبغ هالايميل وتفتك من هالايميل وصاحبه الوقح
    من أمن العقوبة اساء الادب اكيد انه يدري ان الناظرة ماراح تسوي شي فمن جذي كتب الايميل ..

    الله المستعان .

  2. انا اشوف يا اخي هورنت انك تكبر الموضوع !!
    ماله داعي الشكوة على هذا الموضوع ,,
    في امور تحتاج انو الواحد يشتكي عليه وامر بسيط مثل هذا ما اظن انو الجهات المعنية راح تلقي له بال لانه في امور اكبر منهم تحتاج الى متابعه !!
    ثم يا اخي هورنت تعال وفكر في الموضوع من زاوية اخرى
    الحين شخص حاط ايميله يعني فكر شوية وشوف مين هذه البنت الي راح تاخذ هذا الايميل وبتتواصل معاه ,, ماراح تضيفه الا بنت هي اصلا ذات اخلاق مثل صاحب هذا الايميل
    وبتلقاها ضايفه اكثر من شخص وبنت صايعه ,,
    اذا ما ضافت هذا الايميل بتضيف غيره كثيييييييييير
    ما اعتقد انو بنت ناس عاقلة ومحترمه راح تضيف مثل هذه الاشكال ,,
    ممكن يحصل انو بنت محترمه تضيف هذا الايميل لكن بنسبة قليل ,,
    وبدل ما نشتكي على هذا الامر البسيط ,, اشتري بوية وروح امسحه وانتهت المشكلة
    واذا منحرج من موضوع المسح هات هندي واعطيه فلوس وهو راح يمسحه لك
    بسيطة موضوع بسيط , وحله ابسط .
    ^_^

    1. كلامك بخصوص البنت المتربية اوافقك الرأي عليه
      ولكن بخصوص اني اكبر الموضوع والمسألة على قولك بوية والسلام !! كان الواحد ما اشتكى ولا سوى الي سويته من اساسه
      اخوي انا قلت ان الموضوع فيه حرص على ادارة المدرسة من التسيب لا سمح الله ، ويجب ان يكون الموضوع فيه تحذير للإدارة حتى تتعض من الموضوع ويكون في جدية بالأمر ،، ارجو انك فهمت قصدي من السالفة
      وتحياتي لك

    1. الموضوع اكبر من علبة صبغ ! الموضوع فيه تنبيه لمديرة المدرسة ولمن يهمه الامر اخوي عبدالله
      وان شاء الله الرحمن بتمشي الامور على خير
      وطبعا للاحسن
      تحياتي

  3. حدددددددك عجبتني يا اخ هورنت
    انا قبل يومين كنت رايحه اخذ اخوي من مدرسته
    وشفت العجب العجاب
    تسيب ما بعده تسيب
    ما قدرت اسكت
    ولما كلمت مدير الدرسه
    والا المدير اردى منهم
    ما تصدق شكثر احتريت
    انا عندي قناعه ان المدرسه اهي مصنع الاجيال
    بس ما اقول الا حسبي الله ونعم الوكيل
    لا والاردى ان المدير حط على اخوي حطه من ذاك اليوم

    1. دامك على حق لا تخاف من احد ، وبالعكس يكون هذا تنبيه وتحذير لمن يهمل في عمله
      ونعم مثل ماقلت انت ان المدرسة مهمة في التربية ، واذا المسؤل مو قد هالمكان نشتكي عليه
      والله يعينكم على موضوعكم مع هالمدير
      تحياتي

  4. مع احترامي الشديد أخي ,, انت أخطأت اكثر من المديرة , مدام لك سنتين تشوف الإيميل , ليش مامسحته ؟ , الوطن للكل وليس مخصص للمديرة !!

    1. وجهة نظرك واحترمها
      عموما انا حاليا سويت الي علي وان شاء الله راح اتابع الموضوع ومفكر كذلك اني امر المنطقة التعليمية بكرة لمتابعة الشكوى
      تحياتي

    1. ووجهك اخوي طلال ،،،
      انا اسوي الي اقدر عليه والي يرضي ضميري ( دامه بمقدوري ) ليش ما اسويه !
      اشكرك

  5. غريبه سنه ونص.
    وين العمل التطوعي من اهل المنطقه ما في احد تطوع قام وشراء بويه بخمس ريال ومسحها…
    والله عجيب 🙁