الرئيسية » اخبار » كسرة موطبيعية من ابل اليوم !!

كسرة موطبيعية من ابل اليوم !!

امس موقع ابل غير صفحته الرئيسية بالكامل ووضع إعلان كبير يقول فيه أن اليوم سيتم الإعلان عن شيء سيجعل الناس كلها تتذكره ولن تنساه أبدا !! والحق يقال أنهم صدقوا في إعلانهم لأنهم كسروا فينا وحطوا لنا الفرقة هذي الي بالصورة وهي للبيتلز

بالنسبة لي ولغيري هذا الخبر يعتبر كسرة وما يفيدنا ابد ، ولكن الموضوع تجاري بحت بالنسبة إلى أبل لبيع أغاني هذي الفرقة الشهيرة جدا على مستوى العالم

كثير منا في تويتر وأنا أحدهم قام يفتي بخصوص الإعلان !! توقعنا مثلا ان تصبح خدمات موبايل مي مجانا وتوقعنا أن يتم عمل تزامن بين الأجهزة كما هو الحال في قوقل أندرويد و و و و لكن  الموضوع طلع خاص لمعجبين هذي الفرقة الموسيقية بالذات ، يالله ننتظر الكسرة القادمة يمكن يتم التعاقد مع فرقة التلفزيون الكويتية !!


28 تعليق

  1. مبروك عليكم “الخنافس”

    “:)

    الحين اغانيهم بتنتشر دام انها من ” بويعقوب ” ستيف جوبز “:[

    • طبعا راح تنتشر بشكل كبير خصوصا للجيل الجديد الي مايعرفهم ، والموضوع كله تجاري بحت
      حبيب المياس

  2. لعبوا باعصابنا ياخي
    قلت اخيييييرا راح ينزل الابديت اليوم..

  3. ههههههه شوف وجه الـ….. وحلب لبن

  4. اذكروها

    بداية نهاية ابل 🙂

    وخصوصا بقيادة ستيف

    • كل شيء جايز بوحمود ، مافي شيء يبقى على حاله واتوقع انه المستقبل لأندرويد والله اعلم
      بكل الأحوال انا مع المفيد وليس فقط أبل 🙂
      حبيب …

  5. Mohammad Alajmi

    والله اني ليما الحين منغث و متحبط من كسرتهم الخايسه !!
    إعلان مفاجئ .. و يوم لن ننساه، آخرتها خنافس خشتهم تجيب الفلَس :@
    الظاهر ستيف كبر و خرف .

    • الله يلوم الي يلومك 🙂 انا شاد حيلي ومخلي الأهل يخلصون زوارتهم بالعيد بأسرع وقت علشان ارجع البيت هههه و الحمد الله اني مسكت نفسي بهذا الموضوع بس زين ماتهورت وكتبت اكثر من جذي

      بس يالله الموضوع دام فيه الخنافس اليوم فهذا يفتح الباب بمطالبة ابل لضم خالد الملا و بشير الشنان والطقة ليش لا ؟ هاهاي

      حبيب اخوي محمد يبيلنا عصير ليمون نريح المزاج الي تعكر من ابل اليوم

  6. هههههههههههههههههههههههههههه
    والله بردت جبدي فيهم
    تسلم يابو ناصر

  7. شفت سلون أنا منصدم والله من هالشي اللي يسوونه أثبتوا أنهم أصحاب دعاية اعلان ناجحين الصراحة 🙂

    • فعلا شركة ابل ما في احد يغلبها في امور التشويق والدعاية
      والساعة المباركة فرانكوم هالمرور الطيب

      • ساعتك أبرك 🙂

        على كثر مايبطون جبدي الا أن أغلب أغراضي أبل اب أبل 🙂
        آيفون
        آيباد
        ماك بوك برو
        آيبود كلاسيك
        أيبود تاتش

        🙂

        ناقصني أغير من ويندوز الى آي ماك 🙂

  8. قاسم ابراهيم

    غثيثين حدهم قسم
    الحين يوم لن ننساه واخر شي هذيلا الخبول
    صج ابل طاحت هيبتها وثقلها عندي
    الي مايضحك بيضحك علينا اليوم

    • بالنسبة لي ولك ولكثير من العرب هذا الخبر مضحك وعادي
      بالنسبة لهم فهذي تجارة ومكسب كبير جدا لشهرة هذي الفرقة وجلب أغانيها إلى الآيتونز
      صحيح كلامك بخصوص الشماته اليوم ههه
      تحياتي

  9. واكا واكا

    والله قلت يابوناصر بتوتر قلت آخر شي بيطلع تحديث لبرنامج IMOVIE على الآيفون >>> قصدي بيطلع شي سخيف مايستحق هالضجه

    وهذا هو ولد الضيعه السوري حاطلنا اربع بواريك ومسوي فيها فلم هندي ويوم ماراح ننساه
    من الناحيه التجاريه والإعلانيه حركه قويه للتسويق

    انا واحد من الناس ماكنت أدري شنو هالفرقه وأول ماشفت الإعلان سويت بحث وطلعلتي

    شكرا يالحبيب وكلم صاحبك ورفيجك ستيف لا يكسر فينا مره ثانيه

    • هلا بوفلان
      دزيت له ايميل وللحين مارد علي !! الظاهر مفتشل من الموضوع
      ماعليه امسحها بوجهي المرة هذي 🙂
      صدقت بتوقعك في تويتر وانت الاقرب ، ولزوم نبلغ الشيخ بالسالفة علشان تاخذ جائزة
      حبيب ابو فلان …

  10. الظاهر بطل سحره 🙂

  11. بصراحة حركتهم عجبتني لان كسرو بالعالم

    وبصراحة قاعد افكر بحملة ضد ابل لان اسعارهم خيالية والي مصبرني عليهم اهو موضوع الجرافيك يعني لو شركات برامج الجرافيك العملاقة تحس فينا وتنزل نسخ خاصة بنظام لينكس كان من زمان تخليت عنهم, انا قلبي يعورني لان دافع اكثر من 1500 دينار على جهاز ماك برو وشاشة سينما و اكثر من 500 ماك بوك برو بس راح اشتري سيرفر داخله جم بروسسيسر و ويندوز 64 واقاطع ابل واتحمل الانتي فايروس
    ادري الكلام ماراح يعجب الكثيرين بس لو ماقاطعناهم ماراح ينزلون الاسعار بحدود المعقول

    • اعتقد أنك عارف شنو تتكلم عنه خصوصا بموضوع الجرافكس
      لو تعمل مقارنة مع الكمبيوترات ( تجميع ) على المزاج ! راح يصل السعر مقارب للماك برو
      بكل الأحوال انت اعرف بوضعك
      تحياتي

      • لا اخوي فرق السعر وايد بس يعتمد شلون تجمعه ومن وين يعني لاتروح اي محل بحولي وتاخذ القطع ,لازم تروح حق المصدر الرئيسي للبضاعة والمصادر بعيدين عن زحمة بن خلدون او خارج حولي
        وتحياتي لك

        • نعم اعرف قصدك تماما
          ولكن انا قلت اذا تجمع لك كمبيوتر ( على المزاج ) يعني مواصفات تستاهل
          و للعلم تقدر تجمع كمبيوتر اغلى من البرو ، وأعتقد تعرف الأسعار للقطع الي تسوى ! مثلا في كرت شاشة انفيديا 2 جيجا سعره في النت فوق الألف دولار وقيس عليها القطع الأخرى
          طبعا بنظري هذا الكمبيوتر ( الماك برو ) مختص فقط للمصمم او الجيمر المهووس بالألعاب ذات الجرافكس الكثيف
          تحياتي

  12. تصدق عاد .. لما شفت الاعلان قلت ..بس خلاص بشتري ايفون .. ولما عرفت انها حق البيتلز .. رحت اشتريت سوني اريكسون x8 🙂 اشرف منه مليون مره 🙂