الرئيسية » رسالة » المدرسة تعلم عيالنا Pijama Party

المدرسة تعلم عيالنا Pijama Party

هذي الورقة احضرتها ابنتي معاها من المدرسة و صدمت لما شفت هالصورة والي بدون شك ليست من ضمن المنهج الدراسي ولا لها اي صلة بعاداتنا و كأن المدرسة تعترف بوجود حفلات البيجاما عندنا ومن يعرف ربما هي عاشت هذا الدور وتريد ان تنشره بين طلبتها ، قررت ان اذهب الى المدرسة ومعرفة الموضوع اذا فيها دودة مو تطلعها على عيالي !!

حفلة البيجاما لمن لا يعرف : هي تجمع بنات بلباس بيجاما النوم ( غالبا ) قمصان نوم والتجمع والسهر و حدث فلا حرج !! يعني بالعربي بنات يتجمعون وشسمه …. اترك لكم الخيال الواسع في التفكير في ما يحدث ! نعم ممكن أن تصبح حفلة البيجاما ايضا للأطقال ولكن هل هذا الشيء عندنا ؟ هل نحن نقبل بمثل هذي الحفلات النص كم ؟ هذي عادات نسمع عنها عند الدول الغربية وهو شيء عادي جدا عندهم ، هل وصل الحال الى هذا الأمر بالإنفتاح ومحاولة التقليد بهذا الشكل ؟

الصورة بالنسبة للأطفال الصغار بعمر بناتي وكما تشاهدونها ترمز بدون شك للبراءة واللعب وليس أكثر ( ولكن ) المصيبة ان من اعطى هذي الصورة لإبنتي هي مدرسة اللغة الإنجليزية ، وعند سؤالي لبنتي هل قامت بتعليمك عن محتوى الصورة ؟ فقالت لي لا فقط كنا نتعلم على الكتابة باللغة الإنجليزية وهذي الكلمات والصورة ليست من ضمن المقرر ، وعندما انتهينا من الحصة اعطتني هذي الصورة وبس .

ماذا لو سألتني أبنتي عن معنى هذي الحفلة ؟ هل أكذب وأقول لها معلومات مغلوطة ؟ أنا أكتفيت بالرد عليها أن هذي الكلمات ليست من ضمن المقرر ولا يجب أن تحفظين معناها او تعلم كتابتها << هربت بالموضوع قبل أن تسألني وضيعت السالفة !!

قررت ان اذهب الى مدرسة البنات وطلب مدرسة المادة وسؤالها عن محتوى الصورة وهل تعرف معنى الجملة Pijama Party أم أنها هي لا تعرف مع العلم أنها مدرسة مادة الإنجليزي والمفروض تعرف ما تقول وتعلم الأطفال ، يجب أن يتم ايقاف هذي المهازل وعدم التهاون في أبسط الأمور ، فالصغير يكبر !! ويجب أن يكبر نظيف العقل والتربية إن شاء الله


43 تعليق

  1. اولا الله يحفظ بناتك وبناتنا وبنات المسلمين من شر وكل فكر ه دخيله.
    ثانيا ان كانت لا تعلم معناها فهاذي مصيبه وان كانت تعلم فالمصيبة اعظم وهو نوع من زرع عادات تخل بالحياء .
    اخير عسا الله يهديها وتصلح هذا الامر. 

  2. جلخهم ، ولا تتركها ،،، وهو تصرف فردي من تلك المعلمه !

    واشتك عليها

    🙂 مسكينه ولت ، بس هي تستاهل

    والله يخليلك بناتك ويفكنا من شر هالمتخلفين من المعلمين

    • النية تنبيه هالمرة فقط ولا ناوي اكبر الموضوع لأنه ما يستاهل اكثر من تنبيه فقط
      عيالنا يلقطون من المدرسات كل شيء وماني فاضي الصراحة يلقطون منها الشيء السيء ابدا ابدا
      اشكرك

  3. يعطيك العافيه بوناصر بس في جيل طالع هل فتره غريب جداً

    *حفلات ديسكو = يلبسون اهدوم فوق الركبه
    *حفلات رياييل = دشاديش و كل وحده لازم تكون وياها رفيجتها يعني مرتها يعني بالاخر نظام بويات
    *حفلات بجامه = يلبسون اهدوم النوم اي نوع منها حتى اللي غير محتشم

    والكثير من الحفلات الغريبه و المشبوهه

    و يعطيك العافيه انك نبهت إلي مايعرفون هل سوالف عشان يحطون بالهم على اعيالهم

    ملاحظة كل الحفلات السابقة للبنات فقط

    • مصيبة يا رجل الي يحصل ، واولياء الأمر يعتقدون أن اجتماع البنات هين ولا يوجد فيه شبهه
      انا الي اشكرك على الإفادة هذي

  4. والله أحيي فيك يابوناصر هاذي الروح

    فعللا ليس من حق المدرسة إدخال شيء من العادات غير الموجودة في المجتمع

    أنا اول مره أسمع بحفلة البيجاما

    قد ينظر لها الغير أن هذا تشدد وأخذ نظرة بعيدة مبالغه فيها لكنها فعلا تغرس الأفكار في الاطفال ثم يتمسكون بها وهم كبار وبالتالي مثل ماتفضلت تصير شغل قمصان نوم

    الله المستعان

    • اعتقد انت اكثر شخص قريب من هذا المجال ( اقصد التدريس ) مو شيء ثاني هههه وعارف للمسموح والمرفوض في المدارس
      نعم وجب علي الذهاب والتنبيه لهم بهذا الموضوع
      اشكرك بو فلان

  5. الظاهر المدرسه لا تعلم شي و ساذجه..

    على العموم ممتاز مراقبة الأولاد ومتابعتهم بدقه لمعرفة شنو يتعلمون وتصحيح الاشيا الخاطئه بسرعه

    أيضاً يجب تنبيه ناظرة المدرسه بالموضوع وأخذ تعهد منها بمنع هالاشيا ألخارجه عن المقرر وايضا انها تجتمع بجميع المدرسات وتنبههم

    • انا اتوقع هذا الشيء من المدرسة انها ماهي عارفة معنى هذي الحفلات والى الآن انا أحسن النية ، ومثل ما قلت راح امر المدرسة بعد قليل للتنبيه عن هذا الأمر
      اشكرك بو حمود

  6. الدبور F18--C

    عفوا اخوي …..بس انت من وين ماخذ (تعريفك) للبجاما بارتي ؟

    وليش هالنيه السيئه والنظره السوداويه للأمور ؟

    البجاما بارتي …اهيا حفله (بريئه) خاصه بالاطفال …..
    حالها من حال اعياد الميلاد وحفلات التخرج …….

    وبالنسبه (لتعريفك) ..فــكل شيىء له استخدام سيىء …

    يعني بالكويت …ماكو دوانيات خاصه للشواذ ؟
    اكيد فيه ….عيل ليش ما نمع الدوانيات كلها ؟

    وبالنسبه لموضوع العادات والتقاليد …فــأهيا مدرسة لغه انجليزيه …يعني ملزومه تعلمهم الثقافه الانجليزيه ….واسلوب حياة الانجليز …..يعني اهيا ما سوت شيىء غلط ولا طلعت من المنهج …..

    صفوا النيه يا عالم !!!!

    • التعريف للبيجاما بارتي ما يحتاج اوضحه لك اكثر !! تقدر تكتب الإسم في قوقل وتشوف العجب

      والتعريف الي قلته عن الدوانية شواذ هذي تسميها دوانية بذمتك ؟ وعلى فكرة اول مرة اسمع احد يقول عن دوانية شواذ ( اذا كانوا قاعدين بدوانية اصلا ) انها دوانية !! وتكرم الدوانيات من هالأشكال

      النية صافية وتم مخاطبة الأخصائية وبدون مواجهة المدرسة نفسها حفظا للحرج ، وتم تدارك الأمر
      وعلى وصفك ان المدرسة لمادة الإنجليزي وهذا واجبها تعلم الطلبة هاللغة والثقافة ( بأي طريقة ) كانت !! طيب شرايك اخليها تعلم الطلبة جمل شاذة مثل boy friend والذي منه … مو هذا انجليزي وثقافة إنجليزية على قولك ؟

      النية صافية ولكن الوضع الحالي يخوف ووجب الإنتباه والحذر

      تحياتي

      • الدبور F18--C

        اوكي اكتب Pajama Party في جوجل وادخل على الصور واحكم بنفسك ؟

        يعني الحين ..حفلات التخرج بالغرب كلها (خرابيط) وفساد ……ليش ما نمنع حفلات التخرج بالكويت!!!!!

        وين تبون المدرسين يبدعون بشغلهم وانتوا تبون تعلمونهم حتى شغلهم !!!

        وبالنسبه للـــ boy friend …

        شرايك نمنع كلمة (صديقي) من مناهج اللغه العربيه …ونراجع جميع الكتب الدراسيه من اولى ليه 12 بحثا عن الكلمه الشاذه (صديقي) !!!!؟

        !!!!!!

        • رأيك ونحترمه بدون شك ( ولكن ) أختلف معاك فيه من قلب
          انت مقتنع وخالص ،، والناس قناعات !!
          تحياتي

        • Yousef ALRasheed

          مدرسة اللغة الانجليزية تعلم اليهال عادات الغرب ؟ من متى ؟

          مدرسة اللغة الانجليزية تعلم اليهال اللغة الانجليزية وبس مع عادات وتقاليد العرب <-- هذا اللي اذكره من الكتب الاماراتية !pajama party وهالخرابيط مو موجودة بالمنهج 🙂 وبعدين الياهل بهالعمر المفروض مايفتحون عينه على الحفلات لا 🙂 والمختلطة بعد مثل ما هو واضح في الصورة------------والمدرّسة المفروض تدير بالها وتشوف الصورة الف مرة قبل لا توزعها من حق الاخ "هورنت" " بو ناصر اذا ماني غلطان" انه يكلمهم فقط للتنبيهولو اي واحد يخاف على عياله وعيال الناس راح يسوي مثله

        • الدبور F18--C

          انت قلتها بنفسك (الكتب الاماراتيه) …..
          الحين تغيرت الكتب والمناهج وصار مدرس الانجليزي ملزوم يعلم الطلبه اسلوب حياة الانجليز …..و مدرس الفرنسي يعلم اسلوب حياة الفرنسيين …..
          وهالمنهج صاره اكثر من سنه واهوا قاعد يدرس ….ما اشوف احد اشتكى ولا اعترض !!!؛

          ……
          اقول اخ يوسف …..

          شرايك بالاختلاط الحاصل بالروضه ؟
          مو جنه يفتح عيون اليهال على الجنس الاخر ؟
          انا اطالب بمنع الاختلاط برياض الاطفال حفاظا على اخلاق ابنائنا !!!!؟

          يا جماعه احنا الحين بندش بسنه 2011 …..يعني ياهل الابتدائي ولا المتوسط قام يفهم بهالامور اكثر مني ومنك !!!

          !!!!!

  7. يمكن المدرسه ماكانت عارفه شنو بجاما بارتي اخذتها من جانب البراءه

    ولكن زين سويت يابوناصر انك نبهتها واهيا يمكن ماكانت منتبه او كانت نيتها صافيه

    وهالعادات ان دشت راح يصير انحلال بالمجتمع اكثر واكثر للاسف

    قبل كنا نقول عيب للي يشرب زقاير

    واللي ياكل بيده اليسار

    الله يرحم زمان اول

  8. بسم الله الرحمن الرحيم

    السلام عليكم ورحمة الله وبركاته

    مشكوور يا استاذ هورنت على المدونه ما شاء الله رووعه وعسى الله يوفقك ان شاء الله

    طبعا للأسف مو بس مناهج اليهال حتى احنا بالثانويه طبعا العام لم كنت 11 علمي والحين الحمدلله 12 علمي :$ المهم تتوقع شنو ناخذ ؟؟ عن ديانه اليهود حصه الانقلش؟ وكانت الابله تشرحها واحنا مصدومين لأن شكو تشرح عن شي مو حقنا وعن درس كان اسمه baby shower تتوقع شنو معانته ؟؟ لا اتقول استحمام الطفل لأ 🙂 الله يسلمك ان اللي توهم متزوجين يسوولهم حفله يسمونها baby shower وطبعا يعني اصدقائهم وعائلتهم وقرايبهم ان اييبولهم هدايه حق الطفل << انزين لو ان الله كاتبلهم ان ما اييبون عيال الاغراض هذي وين يودونها ؟ طبعا هذي عاده عند امريكا يعني اول ما يتزوجون سيده يسوون الحفله واما اختي اللي كانت ابأولى ابتدائي كانوا ياخذون عن عيد الهالوين وهالشي مو بعاداتنا ولا تقاليدنا؟ يعني الحين خلاص المنهج الكويتي من امه اخترب ومنهج عاشر اللي اهو (( ثانيه ثانوي )) يدرسون عن مجمعات الكويت << وهالشي ما اجوفه هدف :\ وطبعا كانوا حاطين عن مجمع 360 :\وسووري لأني طولت بالكتابهتحياتي اختكA,biguity

    • الدبور F18--C

      وين المشكله بالموضوع ؟
      وشنو يعني اذا خذيتوا عن البيبي شاور ؟
      البيبي شاور : لمن المره تكون بأخر شهورها من الحمل , يسوون حفله ..ويحضرها الاهل والاصدقاء واييبون معاهم هدايا للطفل ويظهرون دعمهم له ….يعني مثل حفلات الاستقبال و العانيه عندنا ……
      وين المشكله بالظبط ؟
      واذا خذيتوا عن اليهود شنو يعني ؟
      هذا يدخل من باب اعرف عدوك …..وبعدين اليهود ماهم ملحدين عشان ما نقرب ولا اناقش موضوعهم ….اليهوديه ديانه الهيه حالها من حال الاسلام والمسيحيه …..

      يعني منهج انجليزي ,,,, شنو تبون يعطونكم ؟ فن القلطه ولا الشعر العربي ؟

      انتوا طلبه ثانويه …..يعني منتوا يهال ولا اغبياء ولكم عقل تقيمون فيه الاشياء وتوزنوها …
      يعني بعد سنه , لو عطوكم بعثه حق امريكا ولا بريطانيا شراح تسوون ؟
      يعني لمن تشوفون بطل خمر في مطار نيويورك ولا هيثرو ,, بتقولون لا بنرد الكويت لان عندهم خمر ؟

      صفوا النيه شوي !!!!!

      • اول شي هي اسمها ( لغة انجليزية ) مو ( عادات وتقاليد انجليزية )
        اجل شكو يعلمونا عاداتهم و تقاليدهم !!

    • اخوي الحين انا قاعده اقوول (( اول ما يتزوجون يسوون هالحفله )) وهالشي مو بعاداتنا وتقاليدنا وثاني شي ليش عيل اهم ما يتعلمون عاداتنا وتقاليدنا وثالث شي شكو نتعلم كلمات يهوديه بالمنهج وليش اليهود ما يتعلمون كلماتنا العربيه ؟؟ انت حدك راهي والله مستانس ان عادي ان اتدش عادات وتقاليد مو لنا ؟؟

      ما اقوول الا الله يهدييك كافي لبس الشباب والبنات وتقليدهم الاعمى للغرب وانت شكلك منهم نظام قص الشعر من قصات عبده الشيطان ونظام الجينز لويست (( تكفى لا اتطيح )) وبعدين انت ليش نكدي كل شي مو عاجبك بيجاما بارتي اعترضت عليها وردي همن اعترضت عليه ابعرف انت شنو تبي علشان ترضى ؟؟ باجر لوو عطونا درس يقولون عادي ان البنات ينامون ببيوت الشباب بتقول هالشي عادي مثلا ؟؟

    • سبحان الله.. يعني الفرق بين اللي عندنا وعندهم هم يسوونه قبل الولادة وعندنا بعد الولادة!!
      هم يسمونه بيبي شور واحنا نسميه (استقبال)!!

  9. وآخر شي يا الدبور بدال لا يحطون بمناهج الكويت عادات وتقاليد الغرب ليش مايحطون عادات وتقاليد العرب مو احنا اولى منهم ؟؟ وكافي عاداتنا وتقاليدنا متدهوره

    • الدبور F18--C

      البيبي شاور حفله للأظهار الدعم للطفل ويسونها لمن تكون المرا بأخر شهورها من الحمل ….
      ومن قال ان اليهود ما يدرسون عادتنا وتقاليدنا …..
      بالعكس يدروسنها ومفصلينا عدل …ويعرفون حتى احنا شلون نفكر ….
      …….
      انتوا طلبه ثانويه …..
      بعني كلها سنه ولا سنتين وادخلون الجامعه ولا تروحون بعثات …..
      لازم يفتحون مداركم ويهيئونكم للمستقبل ….عشان لا تكون عندكم ردة فعل سلبيه لمن تروحون الجامعه وتسمعون افكار دكاتره الجامعه ….

      وبعدين هالمناهج حطوها ناس خبراء ….واحرص مني ومنج على اخلاق الطلبه ….
      لايكون تبين تعلمينهم شغلهم بعد ؟!

      • اخوي انا قاعده اقوول اول ما يتزوجون وانت اتقول اخر شهور من حمل المره 🙂 جم مره اعييد

        وعلى قولت اخوي Q8 لغه انجليزيه مو (( عادات وتقاليد باللغه الانجليزيه )) وبعدين اي خبراء اللي تتحجى عنهم ؟؟ منهج ماله هدف ولا تعليمي وبس كل اسئله على الفاضي اميه الف سؤال معطيني مادري شالهدف وثاني شي اييلك سؤال صح او خطأ لم اتحط صح ليش الاجابه صح ولم تبي اتحط خطأ ليش الاجابه خطأ والكتاب من داخل كله حجي ما اتعرف شالطبخه حتى المدرسات متنرفزين من المنهج المنهج لا تعليمي ولا يوعي :\

        • الدبور F18--C

          للمره الالف ,,,البيبي شاور اهيا حفله يسونها لمن تكون المره بأخر شهورها من الحمل …
          انتي اللي فاهمه غلط ….واذا تبين تتأكدين راجعي كتابج ولا كتبي بيبي شاور بجوجل وشوفي شنو بيطلعلج ….

          بعدين ومع كل احترامي لج …انتي شنو مؤهلاتج العلميه عشان تحددين اذا كان المنهج له هدف ولا ماله هدف ؟
          كلنا ايام الابتدائي قلنا شفايده جدول الضرب ؟ وليش يشددون عليه ليه هالدرجه ؟
          بس بعدين لمن كبرنا وفهمنا الدنيا …عرفنا شفايدته !
          وعلى موضوع الصح والغلط ….
          حتى ببريطانيا اللي اهيا ام الانجليزي يعطونهم مثل هالاسأله …
          لا يكون اهما غلطانين بعد ؟
          ليش انتي مو سامعه بسؤال : احكم بالصواب ولا بالخطأ مع التعليل ؟
          يعني باجر لو صرتي دكتوره (ان شاء الله ) وسألج واحد من المرضى انا ليش مريض , بتقوليله مالك شغل انت مريض وبس !!!

          بعدين مستحيل تفهمين المنهج وانتي مو مقتنعه فيه من الاساس !!!؛

          !!!!!!!!!!!!

  10. الاخ دبور الاخوان الي يتكلمون بالموضوع يقولون ان هذه عادات دخيله علينه احنا بعدين عنها كل البعد !!
    اذا موضوع البجاما والشاور عاجبك شي يرجعلك لكن الاغلبيه محافظه على اهلها وبناتها من امور بغنى عنها !!
    وجهة نظرك خاصه فيك والكل يحترمها مو شرط الكل يوافق عليها …الله يرضى على استوعب الردود قبل لاترد .

    • الدبور F18--C

      يا اخي كل حياتنا عباره عن عادات دخيله ….
      يعني السماح بأهلنا انهم يدخلون الجامعات ويشتغلون يعتبر مو عاده دخيله …؟
      التواصل بالمسجات يعتبر مو عاده دخليه ….؟
      وامثله كثيره ما راح اخلص اذا بذكرها ….

      بس فيه فرق بين العادات الدخيله وبين الثقافه و توسعه المدارك وتقبل الراي الاخر …

      يعني تدريس الامور الجنسيه في الجامعه واساسا القاعه مختلطه تقدر تقول عنها قله ادب ؟

      في ناس مختصين بهالامور والمفروض ما نتدخل بشغلهم ….؛
      ما تشوف الناس الحين شلون صارت … محد قادر يتقبل الثاني وتفكيره ما يتجاوز جمجة راسه …..شنو السبب تتوقع ؟

  11. اعتقد ان موضوعك مبالغ فيه يا بوناصر، الموضوع بكل بساطة مثل فكرة sleep over بنات يتجمعون وينامون في بيت وحدة منهم، ويا كثرها منتشرة عندنا بين الأهل والاقرباء بنات الخالة ينامون عند بنات العمة وغيره يعني ماهو شي جديد أبدا، لا فيها لا خرابيط ولا شي، وهذولي بنات صغار شفهمهم بهالسوالف!

    • والله يا عبدالله لو شايف نماين المدرسات في المدرسة ماكنت تلومني !!
      وبعدين انا نبهت الإدارة علشان ما يتم التساهل في الأشياء الصغيرة وتصير بكرة شيء عادي
      تربيتي وفكري بهذا الشكل وخصوصا انا اب لأربع بنات والحافظ والهادي الله بدون شك
      والصغير يكبر يا عبدالله والجيل هذا واعي ومطلع على كل شيء
      حبيب

  12. أخي هورنت..

    قبل حقبة من الزمن لما كنا يهال كنا كلما نزور بيت خالتي و قبل نهاية الزيارة نشتغل حنّه على الوالدة علشان تخلينا ننام عندهم علشان نكمل لعب مع عيال خالتنا ، كنتوا تسوون جذي لما كنتوا صغار مثلنا؟

    هذي بالضبط نفس فكرة البيجاما بارتي 🙂

    أخي العزيز مو كل شي تدوره بالنت تلقاله جواب صحيح.

    أصلا حتى لو بتدور جملة “قطوة” بالجوجل راح تشوف العجب! كل شاردة و واردة راح تلقالها ناس يقلبونها “عجب” .. و كذلك الأمر بالنسبة للبجامة بارتي.

    يعني باختصار البجامة بارتي كما فهمناها من الثقافة الغربية هو اسم النومة عند الخالة الله يطول لنا بعمرها.. لكن بالانجليزي ، يعني هو حدث اجتماعي بريء يمارسه الأطفال قبل الكبار و يتقبله الغالبية العظمى من الناس بما فيهم المحافظين ، ونعم… حتى بالغرب في ناس محافظين و متشددين بعد.. مو كلهم فلتانين أخلاقيا!

    و قواك الله

    • مرحبا …
      اعرف تماما انواع البارتي لهذي البجاما والي تصلح للكبار والصغار
      نعم اعرف ان الغرب لديهم محافظون ( لو خليت خربت ) واعرف ان البعض عندنا يفعل هذي الحفلات
      انا بإختصار شديد اعرف ما أقول !!
      نعرف قصص واقعية بخصوص هذي الحفلات بين البنات من هنا وهناك
      أعرف تماما ماهو المعنى الحقيقي لحفلات البيجاما للصغار وماهو المعني الحقيقي لحفلات البيجاما للكبار ولست بحاجة للنت لمعرفة المعنى ووضعت ردي بخصوص البحث في قوقل كمثال لا أكثر لمن لا يعرف ماهي حفلات البيجاما !! فالموضوع معروف لدي ولغيري أيضا بدون شك
      ختاما…
      أنا نبهت لا أكثر !!
      كل أب أو أم مسؤل عن تربية أولاده وتعليمهم بما يروه صحيح
      تحياتي

  13. الله يخليك لعيالك ويخلي عيالك لك يا هورنت 🙂 وزين ما سويت .. التنبيه مطلوب .. وان عادتها .. بلغنا بس واحنا نفضحها بكل المدونات 🙂 وحياتك يصير اسمها مثل اسم عبدالوهاب العيسى بعد سالفته الاخيره هههههههههههههه

    تحياتي لك .. اخوك وليد من مدونة كويت لول 🙂

  14. الله يعافيك … الموضوع اخذ اكبر من حجمه

    اولا .. المدرسه جدا غلطانه تعطي للطلبه هالسوالف اي نعم .. والله هالاسلوب الجديد في عالم التعليم مادري شلون صاير والمراقبه صايره عليهم خربوطه

    ثانيا : حفلات البيجاما بارتي ليست سوا حفلات يتجمعون فيها البنات ونوع من انواع كسر الروتين يلبسون ملابس النوم اللي البنات الصغار متعودين عليها .. يعني بالعقل مافي بنت مو متزوجه تلبس قميص نوم ولا قميص النوم هذا شحقه من الاول يكون بكبتها وعلى قوله جدتي مستعجله على العرس !!!

    كل مافيها البيجامات القطنيه العاديه .. ومافي اي حركات قليله ادب ولا احاديث من نوع اخر ولا اي شي من هالاشياء .. كل المواضيع بتكون ضحك وسوالف .. مادري ليش البعض عبالهم البنات سوالفهم بطاليه ومافيها الا الفساد الا اذا كانت البنت اصلا فاسده

    بالاول نوع هالحفلات سووها عشان الصديقات يتجمعون عند وحده من بيوت صديقاتهم وينامون عندها عقب السوالف والهذره .. بس مااعتقد كل الاهالي يسمحون لبناتهم يباتون بره البيت فاكيد صارت البيجاما بارتي مجرد حفله كأي تجمع عادي بملابس البيجامات

    والله يخلي لك عيالك وانشالله تكون دوم مهتم وتابعهم و عفيه عليك لانك استفسرت وأنبت المدرسه

  15. انتي مالج شغل
    غذا احد يبي يسوي بجاما بارتي ولا لا انا بسوي كيفي وانا بالمدرسه عمري 13 سنه امي ترضى شتبين

    • بسم الله الرحمن الرحيم

      زينب << يا ماما اشفييج امعصبه ؟؟ في احد قالج لا اتسوين يبا سوي @@اماني << يعطييج ربي الف عاافيه خييتووانا عندي مداخله ترى ساعات مثل هالحفلات مضره لأن اتذكر وحده من رفيجاتي تعرفت على وحده من النت اتقوول امي عادي اتخليني انام بيت رفيجاتي والطامه الكبرى ان اتسوي علاقات << اللهم ارفع عنهم ولا يبلانا *_*والله يحفظ عيالك ان شاء الله يا استاذ هورنت ويخليهم لك يارب ^_^

  16. اممم بجاما بارتي حالها حال هلاقه بارتي وهالسوالف القصد منها الغشمره والوناسه والضحك
    واعتقد انها تعتمد على اخلاق البنات المتيمعين .. وعن نفسي ما اروح الا حفلات اهلي مو الصديقات
    بس الرقابه اللي تمارسها شي حلو ومطلوب بهالزمن اكثر من قبل وياليت كل الاهل يسوون جذي
    اممم يعطيك العافيه والله يخليك لبناتك ويستر عليهم

  17. صح لسانك

    يعني تركت كل قواعد اللغة العربية وماضاق فيها الا هالموضوع؟

    مسخرة
    يعطيك العافية