الرئيسية » رسالة » شركة زين لا تحترم العميل في الكويت

شركة زين لا تحترم العميل في الكويت

حسنا الموضوع عن حديث الساعة ( التقنية ) وهو جهاز سامسونج جالكسي ثري الجديد ، والذي جعل من الشركات تتسابق ولو احتاج الأمر ان يتعاطوا هرمونات منشطة للفوز بسباق من الأول في بيع هذا الجهاز !! وهذي حادثتي مع شركة زين التي ضربت بعرض الحائط هي الأخرى احترام العميل ولم تميز من قام بحجز الجهاز مسبقا

قام موقع شركة زين بوضع صفحة خاصة في موقعهم لحجز جهاز سامسونج وهي عبارة عن ثلاث خانات ( الرقم المدني / رقم الهاتف النقال / لون الجهاز ) وعرفت عن خبر الحجز للجهاز من خلال حسابهم في تويتر فدخلت و قمت بتعبئة الخيارات المطلوبة و اخترت اللون الأزرق ، فوصلتني رسالة بنفس اللحظة تخبرني بتأكيد استلامهم للحجز كما في الصوره اعلى الموضوع

بعدها بكم ساعة توقف الحجز بسبب انتهاء الكمية المتاحة للحجز وهذا شيء بديهي ، ولكن دعوني قليلا اوضح ماهو الـ Pre Order

ماهو Pre Order ؟

هو حجز مسبق على شيء ما غير متوفر في الوقت الحالي ، و عند قيامك بحجز هذا الشيء تكون قد ضمنت هذا الجهاز لحظة توفره ، ولك الأولوية في امتلاكه قبل الآخرين لأنك بادرت و قمت بالحجز ، و يكون لدى الشركة كامل المعلومات عن الأجهزة التي ستصلها ( الكمية / اللون / التاريخ الخ الخ )  اليس كذلك ؟

ولكن ماهو الحجز المسبق من وجهة نظر شركة زين ؟ الإجابة بإختصار ( سلطة ) و تخبط و لا تعرف ماهو الحجز المسبق !! المهم ان الجهاز وضعنا صورته في الموقع و اعلنا عنه في تويتر و من يأتي اولا الى افرع الشركة يحصل عليه سواء كان قد حجز الجهاز ام لا !! بالكويتي من سبق لبق 

ما الذي حصل عند توفر الجهاز في شركة زين ؟

الذي حصل شيء مضحك حقا و يدعو الى السخرية من شركة بمثل مستوى شركة زين التي تدعي الإحتراف في العمل و معاملة العملاء ، هم بشكل فاضح و مخزي ارادوا ان يظهروا للعالم بأنهم اول من يبيع اجهزة سامسونج بأي طريقة ممكنة على حساب العميل نفسه !! انا اعني ما اقول و اعرف جيدا ما الذي اتحدث عنه ، التجني على الآخرين ليس من طباعي وكالعادة انا لا اواجه إلا بدليل …

وصلت الأجهزة لشركة زين وقاموا بالإعلان عبر حسابهم في تويتر انه متوفر في الأفرع ، بل ان حسابهم في تويتر يتباهى بأن الطلب على الجهاز كبير و الكميات قاربت على الإنتهاء !! الى ان فعلا انتهت الكمية التي وصلت لهم بسرعة كبيرة

كل هذا حصل وانا اشاهد ولم يصل لي اي خبر او حتى رسالة تخبرني بأن جهازي موجود وكل ما علي فعله ان اتوجه للفرع و استلمه ، هل حصل هذا ؟ بالطبع لا ، دائما عودتنا هذي الشركة اننا نحن من نقوم بالمبادرة و الإتصال حتى نطالب بحقنا الذي يعتبر ضايع عند هذي الشركة

اتصلت بخدمة العملاء 107 ليرد علي شخص ليصدمني بقوله انه علي الإنتظار اكثر من اسبوع ، طلبت المسؤول وقلت له اريد تقديم شكوى بهذا الأمر ، المضحك انه يقول لي لا استطيع ان اقدم لك شكوى الى ان جادلته و قدمت تبريراتي على الأمر ، ثم قال حسنا سأقدم لك شكوى وانا على علم بأنه لم يفعل !! <<< مكالمتي مسجلة وساستخدمها بدون شك إن شاء الله

هل تعلمون ماذا كان رد الشركة والعذر المضحك الذي تعذروا به علي ؟ تواصل معي القائمون على حساب تويتر الرسمي لشركة زين ؟ ثم اتصلوا بي هاتفيا و كان الجواب بأن الجهاز باللون الأزرق غير موجود وفقط يوجد اللون الأبيض ، طيب ماهذي الصورة ( اضغط للتكبير ) الموجودة في موقعهم :

وهل قامت الشركة بالتواصل معنا لتخبرنا بأن اللون الأزرق غير متوفر ؟ وهل قامت الشركة بتحديث موقعها لتضع تنبيه بهذا الشيء ؟ طبعا لا ولا يهما الأمر لأن العميل هو آخر اهتمامها و يعجبه يعجبه ما يعحبه يضرب راسه بالحائط !!

وانا اقول لهم من الآن الآتي :

نقل الأرقام قادم لا محالة إن شاء الله و لحظتها ستعرف شركة زين حجمها الطبيعي 

إنتهى …

 

 

 


44 تعليق

  1. فعلا مصيبه عدم الالتزام مع عملائهم شركة زين همها الأول والأخير الربح ب اى طريقه كانت للأسف ، شكرا هورنت

  2. شين عالم قبيح

  3. يا عيني عليك يا بوناصر بعد حيلك بكل الشركات اللي ما تحترم عملاءها
    انا من زمان حولت و افتكيت منهم الحمدلله و الدور على الشركه اللي
    الحين فيها و بحول منهم قريب لووول ما عندنا ولا شركه محترمه لا من
    شركات خطوط هواتف متنقله ولا من خدمات انترنت ولكن الواحد يدور
    على اهون الموجود والله المستعان !!

  4. شكرا اخوي هورنت موضوع مميز

    انا اقول من كثر

    شفاحة الشركات عندهم المواطن بوك فلوس يمشي

    بأختصار انا ابي اترك شركة شين
    وروح لفيفا بس عيب فيفا ناس وناس بالارقام الحلوه’’

  5. سلام عليكم
    كيف الغي اشتراكي في المدونه لو تكرمت

    • من اي خدمة بالضبط ؟ الخلاصات ام الايميل

      عموما … ارسل لي ايميل من نموذج المراسلة في الاعلى وابشر

      تحياتي لك

      • اخوي انا حجزت من عندهم و قالولي استلمه اليوم اخر موعد ساعه عشر بالي… تبي لنا شكلي ماني ماخذه twitter @Yalarbash

  6. انت عالاقل عندهم عذر انه الازرق ماوصل

    يا أخي انا حاجز اللون الابيض ولا وصلني مسج ولا شي

    شركة زين ماعندها سالفه بموضوع الجالكسي اس 3 كله بهرجه اعلاميه وحجي فاضي وخرابيط

  7. انت الربحان سعرهم مرتفع ومرتبط بباقات وفوق هذا جنك مو عايش بالكويت كل شي بواسطة

    حيلك بشركة بلينك عطنى اخر الاخبار نبي بوست على الاجراءات الي اتخذتها

  8. ضاري العضيله

    اذا انت اميل بشكة زين كنسل خطك منهم وحول لشركة ثانيه.
    ثلاث خطوط اللغيتها من زين والرابع خط داتا والسبه خدماتهم وطريقة تعاملهم مع عملائهم

  9. هوه صح غير متوفر الازرق عند حتى البابطين الوكيل وحسب كلامهم لن يتوفر بشكل وسمي قريبا

    لكن هذا نوعذر كان يجب ابلاغكم بالامر مسبقا ولكم الحق بالاختيار

    متى كانت الشركات تهتم بالعميل عندنا

    اضيف يعني هل يستحق الجهاز كل هالتسابق على شرائه

    ماني عارف اشفينا نهب هبة رجل واحد مانعطي الجهاز حتى فتره للتجربه

  10. عساها اكبر المشاكل عندك
    عندنا الشركات الثلاث ( زين و فيفا وبتلكو )
    قالو احجزو عن طريقا لموقع
    ولمن حجزنا وصل المسج والي حجز والي ما حجز اخد
    وقالو اول 50 شخص يحجز له هدايا
    ولمن رحنا قالو لا
    اول 50 شخص يستلمون الجهاز
    والي يرفع الضغط تتصل الى خدمة العملاء يقولون اول 50 شخص حجزو هم يحصلون وتروح الفرع يقولون اول 50 شخص استلمو

  11. يعطيك العافية أخوي هورنت على كتابتك عن هالموضوع

    للأسف الشركات عندنا فاهمين مصطلح الحجز المسبق خطأ ، لأن الحاصل أن الحجز المسبق ما هو إلا مجرد “تنبيه” بأن الجهاز متوفر بالفروع وكما ذكرت انت “من سبق لبق” ، وللأسف حتى نظام التنبيه فاشل وغير مجدي !!

    المفترض أن يكون نظام الحجز أكبر من كذا ، بمعنى أن الحجز المسبق يتم من خلال تسجيل معلوماتك + دفع قيمة الجهاز أو جزء من القيمة ، بالمقابل تحصل على تأكيد حجزك وتضمن بأن جهازك متوفر لدى أقرب فرع لك (بناءً على معلوماتك اللي سجلتها) وتقدر تتحصل عليه بأي وقت تروح فيه للفرع دون الحاجة إلى الدخول في زحمة المنافسة للحصول عليه ، لأنه بيكون مسجل باسمك ومحد يقدر ياخذه غيرك .

  12. انت طالب الازرق و الازرق مو متوفر ولا مكان (حسب علمي)
    اتوقع هذا السبب لكن الله اعلم يمكن عندهم

  13. اتصلت على حمايه المستهلك ؟ تره يفيدونك

  14. والله ياهي سواليف ومهزله

    هالحركة تذكرني ببعض المطاعم اللي اتصل عليهم عشان يجهزون الطلب قبل لا اجيهم وارتاح من الزحمه

    واذا وصلت وعطيتهم الفلوس يبلغهم يجهزون الطلبية !!

    طيب وش الفايده اني اتصل عليك طيب، اخذ منك اذن ولا وشو !!

    هذا نفس النظام بشركة شين
    اذا كنت من الاساس بتخلي الجهاز من سبق لبق ليش تخلي الناس يحجزون

    لا ومن زود الامانه وقفوا الحجز لأن الكميه انتهت، الله يجزاهم خير حريصين !

    وترى الامور عندنا بشركة زين مثل ماعندكم ويمكن اسوأ [بالسعوديه]

    الاجانب عندنا يتلاعبون بالارقام على كيف كيفك

    احد الشباب يبيع ويشتري بالارقام المميزة وفيه رقم مشتريه بـ 1500 ريال من شركة زين وطبعاً ناوي يترزق الله فيه

    مادرى الا الرقم تم نقله بإسم شخص آخر [سوري اذا ماخانتني الذاكره] وبس لاحس ولا خبر
    قدم شكوى وعدل وبدل وبالنهايه ماطلع بشئ لامنهم ولا من هيئة الفَلَس [هيئة الاتصالات]

    ما اقول الا الله لا يوفق ولا يسعد من كان يتلاعب بالناس ويخدعهم عشان الفلوس

  15. Abdulrhman saad

    افضل الموجود الآن فيفا..انشاء الله راح احول لفيفا.. مصيبه شــيــن بكل مكان مافي شبكه

  16. الله يعينك يا اخوي مع هالشركات لا خدمه ولا ادب ولا نظام عندهم

  17. السلام عليكم.. انا عادتا ما احب ارد على هالمواضيع خصوصا اذا كانت عن شركات الاتصلات بالكويت بس حبيت اقول تجربتي لانه الظليمه شينه! انا حالي حالك و حجزت الجهاز الازرق بس زين اتصلوا فيني و في كذا واحد اعرفهم حاجزين الجهاز الازرق و شرحو لنا انه احنا جدام خيارين يا ناخذ الجهاز الابيض الحين بما انه احنا حاجزين او ناخذ الازرق لما يتوفر! طيب بتقول ليش حاطين الجهاز و ترى سآلنا هالسوال و ردهم كان مقنع انا الجهاز ليلحين مو منتشر و الكويت من الدول الاولى امنزله الجهاز.اابصرحه خيروني و قلت ابي الابيض و غيري قال لا يبه انا بنطر الازرق. سوالي لك اخي الفاضل وين الجذب؟ الشركه اتصلت فينا و خيرتنا و قالت لنا اول ما يوصل الازرق مع باجي العالم الي اساسا ما نزل عندهم الجهاز الازرق بيكون محجوز لنا! اذا انت ما دقوا عليك يمكن ما رديت عليهم و شافوك ما رديت خلوك على الجهاز الازرق. وين الخداع والانتهاز؟ اسمحلي اقولك انه انت حر تكتب الي تبي بس هم اسمحلي اقولك انا اسلوبك مليان تجني و كلامك سلطه و غير مقنع و مليان تحامل على الشركه!. و شكرا زين على اتصالكم و شكرا انكم حجزتولي الجهاز الابيض بعد ما غيرت رايي و قلت ابي الابيض و رجاءا اذا كان عندك بلوق والناس تقرى رايك حط رايك و اراء الناس الي مثلي عشان يكون الحوار عادل و الناس تحكم. و لو تتكرم اتسوي بوست حق كلامي.

    • وعليكم السلام ورحمة الله وبركاته

      افهم من كلامك اني انا اكذب او اتجنى على زين !!

      يا رجل اقولك مكالمتي مسجلة ( وطويلة ) معاهم واختصرتها بالموضوع وطبعا تم طلب التشيك اذا متصلين علي او مرسلين لي شي وكان الرد بالنفي

      بو محمد اسمحلي اقولك اذا ما تعرف شنو الحجز المسبق ، اقولك مبروك عليك الجهاز الابيض الي حدوك عليه

      تحياتي لك

      • العفو اخوي انت منو قال انك جذاب؟ انا قلتلك تحربتي و تجربه غيري و كلنا حاحزين حجز مسبق و العفو ترا انعرف شنو معنى الحجز المسبق زين. كلامي كان واااضح الشركه اتصلت فينا قبل لا يتزل الازرق والابيض و عطونا الخيار بين اللونين و ارد اعيد كلامي قالوا لنا اول ما ينزل الازرق راح اتكونون من اول الي يستلمونه على اساس الحجز المسبق الي سويتوه اعتقد كلامي جدا جدا واااااضح! و مثل ما مكالمتك امسجله كل مكالماتنا امسجله و الشركه كانت اب منتهى الصراحه! اصلا لو مو داقين على الناس الي حاجزين ازرق ما عليهم شي لانه الجهاز الازرق اساسا ما نزل و يبقى الحجز مالنا قائم و اول ما ينزل ابيحجزونه لنا. يعني يزاهم داقين على العالم اخيرونهم؟ اكرر ايخيرووونهم؟
        و اتقول كلامك ما فيه تحامل؟ الله يسامحني عيل اذا انا ظالمك و اترك القرار حق الي يقرى اهو يحكم

      • العفو بعد نقطه بما انك ضليع في مواضيع الاجهزه و شركات الاتصالات. بس فيفا امنزلين اعلان من صباح الله خير بالشوارع عن الجهاز و انا اتصل فيهم من الصبح اسالهم عن الجهاز و محد فيهم بالكول سنتر يدري عن هوا دار الجهاز او سعره او حتى مواصفاته ليما الساعه 10 باليل. اعتقد لو صايره فيك يمكن چان كتبت موضوع عنهم. ولعشان فيفا اعلاع

    • اسمحلي يالطيب كلامك اللي كله تجني عالاخ بدر

      انا واحد من الناس اللي حجزوا الجهاز باللون الابيض ولا جاني اتصال ولا مسج ولا شي
      مع العلم انه لهذه اللحظه ماوصلني ولا شي

      http://www8.0zz0.com/2012/05/26/03/334078308.png

  18. يوسف العتيبي

    انا اتوقع انه بو محمد موظف مخصص للرد عن شركة زين بالمنتديات والمدونات

    • نا اتوقع المدونات بالكويت كلها شغاله حق مصالح الشركات طال عمرك و اقرا كلامي عدل اتعرف ليش رديت هالرد قلنا الظليمه شينه و ماله داعي التبلي. و ردا على الاخ صاحب المدونه ما كلمتك عن مقالاتك القديمه انا قاعد اقارن الي صار بين الشركات على موضوع ال اس ثري و مدى وقاحه الاعلان الي نزل من باجي الشركات

      على كل حال الموضوع مو عن فيفاالموضوع عن الرد على سالفة الحجز المسبق و اعتقد كلامي كان فوق الواضح والي عنده تعليق ارجو انه يقرى الرد الي قلته قبل لا ق و شكرا

      • توقعك مو في محله !! اسمحلي اصابعك مو سوا

        عزيزي انت تعتقد شي ( واغلبنا ) نعتقد شي ثاني ، واتوقع مهما حاولنا نرد عليك انت مقتنع ان شركة زين ممتازة ! وهذا مافيه شي لان الناس قناعات

        عموما الله يبارك لك في جهازك ( الابيض ) الي كان المفروض يكون ( ازرق ) …

        تحياتي لك

  19. محمود الخطيب

    كان الله في عونك على التعامل السئ والتجاهل من شركة زين ، انا يا اخي بعاني ايضاً من هذه الشركة ومشكلتي او مشكلاتي كالآتي :
    عندي خط زين فواتير وقمت بالاشتراك معهم بخدمة الانترنت ٧.٢ ميجا وعندما بدأت باستخدام هذه الخدعه (اقصد الخدمة) وجدت انها بطيئة جدا ولا تلبي احتياجات اي مستخدم عادي يقوم بالتصفح والايميليات واليوتيوب ، عندها قدمت طلب عن طريق شركتي ( حيث انه خط فواتير باسم الشركة) لترقية السرعه الى ٢١ ميجا. وتم اخباري انه لن ادفع ايه غرامة فصل الخدمة القديمة حيث انني ما زلت مستمرا في التعامل ولكن تم عمل ترقية فقط للسرعه ،، تفاجأت انه تم اضافة مبلغ ٣٠ دينار رسوم فصل خدمة الى الفاتورة وعندما قمت بالاتصال بالشركة اخبروني انهم سوف يقومون بحل هذه المشكلة ، ولكن مضى على هذه المشكلة اكثر من ٦ شهور حتى الآن ولم استلم ايه مبالغ من قبل الشركة ،، المشكلة الكبرى ليست في هاذا المبلغ البسيط ، المشكلة الاكبر ان السرعه الجديدة ٢١ ميجا هي عبارة عن ٢١ كيلوبايت !!!!! تقدمت بالعديد من الشكاوي بدون فائدة وفي النهاية اخبرني موظف الخدمة انه (بصراحه احنا خدمتنا ما بتغطي بعد الدور السادس وانت ساكن بالتاسع) يعني الحل عند شركة زين اني ارحل من شقتي عشان يزبط النت عندي !!!! لا والمصيبة كمان انو معطيني داونلود ٣ جيجا بالشهر وتفاجأت انو لما يخلصو ما ينفع اشتري سعه تحميل جديدة مثل بقية الخطوط المدفوعه مسبقاً ، لا وبيعثولي رساله انو راح ينزلو سرعه النت عندي ،،،، يعني اقل من ٢١ كيلو بايت ايش ضل في سرعه !!!!!

  20. أخالفك الرأي،، و أعتقد الأولوية للي حاجزين اللون الأبيض، لنفرض ان الي حجزوا اللون الأبيض ٧٠ شخص و تم توفير ٥٠ جهاز فلهم الأولوية في الحصول على هذا الجهاز كونك أنت اخترت اللون الأزرق، لو انك اخترت الأبيض و ماتصلوا عليك ولا بلغوك هني فعلاً نحط اللوم عليهم.
    انطر اذا نزل اللون الأزرق “حتى لو ماتبي تشتريه” اذا نزل عندهم و مابلغوك هني لك الحق ونحط اللوم عليهم، لكني أخالف رأيك بالموضوع و أعتقد ان شركة زين غير مجبرة بالإتصال عليك اذا انت ماخترت الأبيض.
    في المرات القادمة اختار الاثنين و اخذ الي يوصل أول وقولهم كنسلوا الثاني 🙂

  21. انا طلبت اللون الأزرق بس صدموني بس موزعين الأبيض.!!!!

  22. السلام عليكم ورحمة الله وبركاته

    الى الاخ هورنت صاحب المدونة والاخ بو محمد ادا مايحرجه الرد…
    (ناخذها بمبدأ العميل وامتيازاته ومبادراته)
    في حالة اختيار الازرق.. هل تم وضع ملاحظه بعدم توافره قريبا؟؟
    أو شحنات الابيض الاقرب توافرا؟؟ او حتى قريبا بين قوسين؟؟
    ….
    بالعربي
    مايصير يعلنون عن شغله وبعدين يتعذرون لعدم توافرها
    لو رحت الوكاله وحجزت موديل لم يصل وبمواصفات ولون اخترته.. وتم تأكيد حجزك ودفعت مقدم..
    شنو يكون شعورك اذا دقو عليك وقالو تعال استلم وتلقاها لون ثاني؟ غير اللي تبيه؟
    وشنو شعورك لو وصلت الشحنات وتوزعت وسحبو عليك وعلى حجزك؟ ولا حتى عبرو؟؟
    وشنو شعورك لو دقو عليك وقالولك غير اللون اللي اخترته والا انطر يا … لين يوصل طلبك
    لا تقولون هذي سيارات وهذي تلفونات..
    مبدأ احترام العميل واحد ولا يختلف عليه 2 ولكن عدم المصداقية والاستخفاف بالعقول مانرضى فيها..
    تقنعني انهم ماكانو يدرون من المصدر المورد انه مافي دفعات باللون الازرق..
    والا السالفه ضحك على الذقون؟؟
    واذا هم مقصوص عليهم..
    المصدر مسؤول ومحاسب على وعوده وتقدر تحاسب من وعدها واخلف وتعتذر بالوسائل المناسبة.. في حال احترام العميل.. (لغير العرب)
    وللعميل الحرية في تقبل العذر من عدمه..
    مو مجبورين نعذرهم على خطأهم..
    هم مايعذرون العميل حين الدفع..
    بل يتسابقون لرفع القضايا عليهم!!

  23. انا مادري يعني الكل شايل هم جهاز و كفر تقليد و شركه ماتعرف الحجز المسبق !!

    يعني الديره ماشاء الله كل شي فيها كامل

    فيكم شده و قوه انتقدوا التعليم – الاسكان – الصحه – زياده اسعار السلع الاستهلاكيه – باقي الوزارات مو بس كل يوم و الثاني امسوين مشكله كبيره و ضغط بهالشركات عشان كفر تليفون و جهاز , انتوا اتحسبون قاعدين في امريكا ؟ اتقاضون الشركات و اتحاسبونهم ؟

    يبا الديره ديره واسطات يعني لو ادوس واحد بالشارع مايصير لك شي و الاجنبي قاعد يتمرد و يطوف اشارات و يتلاعب بالنظامو البنغالي يشق و يخيط بالوزارات و محد سوى لهم شي

    يعني شركه زين اذا كانت فاشله و اتبوق الناس الغوا اشتراكاتكم ولا اتعاملون معاها في شركتين غيرها و الجهاز امكود بالمحلات و بالشركه اذا مو اليوم باجر بعد اسبوع يتوفر و تقدر تاخذه يعني ما راح يصير فيك شي اذا ما استلمته اليوم , الناس مو لاقيه تاكل و مو حاسه بالامان و يقولون الحمدلله

    صج ناس بطرانه

    انتهى

    • لكل مقام مقال !!

      الموضوع عن تجربتي مع شركة زين ، لو حصل لي موقف مع اي مكان آخر ولدي الدلائل صدقني ما توقفت عن نشره

      انا اول الناس الي يطالب بتطبيق القانون وصدقني غيرنا الكثير ( ولكن ) هل اشتكى احد ام الوضع مع الاسف ( فقط ) تحلطم ؟

      تحياتي لك

      • اخوي فالح والاخ صاحب المدونه و الجماعه الي اقلبو الموضوع سياسي و نظامي.. عسى ما شر ترى قاعد انتكلم عن شركات الاتصالات مو الداو! و هذا.اخر رد لي. على هالموضوع.. حق الاخ صاحب.المدونه و الاخ الي قال انه شركات الاتصلات تضحك على العميل و تسوي نفسها ما تدري انه الجهاز الازرق مو نازل.. اتوقع الي فيكم يتابع منتديات التلفونات الاجنبيه مثل انجاجيدت او جيزمودو و هذول اكبر مدونات تكتب.عن التلفونات بالعالم. اذا ما عليكم امر اقرو مقالات اليوم عن ال اس ثري الازرق و شوفوا تصاريح اكبر شركات الاتصالات الي بالعالم مثل att و tmobile شوفوا شنو كاتبين اليوم.. مو امس ولا الي قبله.. اليووووم. صرحوا انه مافي ازرق الا بعد اسبوعين من يوم البيع الاول الي اهو باجر. والي حاحز ازرق ينطر اسبوعين لين ينزل الجهاز. صراحه انا مصدوم شلون.هالشركات تلعب على العملاء. عموما اهما تري ما اتصلو على عملائهم و قالو ماكو.. اتوقع والله العالم يمكن دزو ايميل. احب اشكر زين انها اتصلت فيني و في غيري اتخيرهم و الله يسلمك يا هورنت انا جدا سعيد بالابيض و انطر الازرق شوف شنو مشكلته و ليش سامسونج تعطلت شحناتها على اخر لحضه.. و اذا مالك خلق.اتدور انا اقولك ليش.. المشكله بالكفر الي ورا مال البطاريه في مشاكل و سامسونج اظطرت انها تتلف 600 الفر قبل اسبوع والسبه هالمشكله.. الكلام هذا موجود في.المدونات العالميه الي تتكلم عن الاجهزه. مع كل احترامي لشخصك لكن احب.اقولك انه اتهامك لزين او لغيرها.من الشركات اليت ال الابيض فقط في الكويت كان غلط و تجني عليهم والدليل انه التعطيل صار في اخر لحضه من.سامسونج.. تاكد ابنفسك و ارجو اذا كلامي كان صح انك تعترف و اتقول كلمتين حلوين حق متابعين المدونه ابهالمناسبه
        شكرا

  24. هذا تدليس ١٠٠٪
    وعد المستهلك بسلعه معينه واوصاف معينه
    وبعد الدفع يتغير الاتفاق!

  25. في الكويت
    تكتب عن شركة ووجهة نظركم اذا تخاذلوا بخدمتك او قصروا…. تواجه التهجم والاتهامات وقلة من يعبرون بمصداقية وحيادية دون مصادرة حق التعبير في طرح هادف..

    خارج الكويت (اللي نسعى بالتنمية لمواكبتها)
    تلقى الكل يحاول المساعدة (في حال وجود لبس بالموضوع) ويعرضون تجاربهم والشركة ترسل اعتذارها وتتواصل مع العملاء وتهتم بآراؤهم…

    اخي المدون…
    من حقك تشتكي وتعبر بوجهة نظر وطرح راقي كالمعتاد ومن حقنا نرد عليك براينا الاخر او نؤيدك بتجاربنا ووجهاتنا..

    لك كل الشكر واتمنى تكون رسالتك وصلت..

    كل الشكر لك يابو محمد على رقيك بردودك المحايدة..

    موفقين خير

  26. تسلم ايدك والله ، شركة زين عمرها ما احترمت عميل وهمها الاول والاخير الصداره والفلوس

  27. شركة زين في الكويت معتمدة على اسمها و قدمها كشركة غير هالشي مافيها مميزات و انا شخصياً اعتبرهم حرامية…شوف عروضهم في السعودية مثلا و شوف شنو قاعدين يسوون في الكويتين!

  28. السلام عليكم …. اعجبني المقال مع ان الرد متاخر … وباختصاار انا ضد شركة زين من كل النواحي ونصابين ويستغفلون العميل ….
    وعلى فكرة الله يقرب له احد بشركة زين خل يحط خطة باسم الموظف قوولووو ليش ؟؟؟!!!!!

    السبب :

    انا كنت حاط خطي باسم موظف بشركة زين وبعد سنتين تقريبا الموظف طلع من شركة زين لاسباب شخصية .. المهم :
    ان فاتورتي شهريا لما كان الخط باسم الموظف :
    20 دينار بس وبالاحرف عشرووون دينار الى 24 دينار تقريبا

    ** وفاتورتي بعد ماطلع الموظف وصار التلفون باسمي
    80 دينار وبالاحرف ثمانون دينار الى 100

    انا راضي ان الموظف لازم يكون له مميزات بس عااااد شدعووه 20 دينار الى 100 يعني دبل كم مره

    والله لو فاتورتي 60 او 50 مو مشكلة بس 100 عاااااد

    وشكراا

    شين عالم خسيس

  29. تـــــــنـــــــبيه
    عفوااا خطا مطبعي

    وعلى فكرة الله يقرب له احد بشركة زين خل يحط خطة باسم الموظف قوولووو ليش ؟؟؟!!!!!

    اقصد ..

    وعلى فكرة اللي يقرب له احد بشركة زين خل يحط خطة باسم الموظف قوولووو ليش ؟؟؟!!!!!

    الله كتبتها كان ياذن الفجر :))))

    ونعم بالله والحمدالله على العافيه