الرئيسية » منوعات » تظليل حراري ماركة لومار LLumar

تظليل حراري ماركة لومار LLumar

قبل شهر تقريبا قمت بشراء سيارة جديدة تاهو 2011 و كما هو معروف في أجوائنا الحارة نحتاج إلى أي طريقة متوفرة لمقاومة هذي الحرارة ، إقترح علي الأصدقاء وضع تظليل حراري و نصحني الكثير بأنواع مختلفة ووقع الإختيار على ماركة لومار Llumar خصوصا بعد أن تابعت ريفيو كثير عن هذي الماركة و كلهم يمدحونها ، الصدمة كما هو المتوقع من الموزع المعتمد في الكويت بأسعاره الخرافية ، ولذلك قمت بطلب التظليل من أمريكا بسعر جدا مناسب

قمت بالتوجه إلى الوكيل الرسمي لماركة Llumar في منطقة الشويخ الصناعية لكي أطلع على الأنواع والأسعار لديهم ، طبعا قبل أن أذهب أليهم كنت قد أخذت فكرة كافية عن النوعيات الممتازة و الأسعار في أمريكا ، وقع الإختياري على النوع CTX (Nano-Ceramic) 35% لكامل زجاج السيارة حتى يكون الشكل جمالي أكثر إضافة إلى المواصفات المتقدمة في هذا الموديل ، كنت سأختار تظليل فاتح و تحديدا كنت سأختار نسبة 50٪ ولكن بما أني لن أحتاج للذهاب إلى الفحص الفني لمدة 3 سنوات فلذلك اخترت نسبة ( أغمق ) قليلا ، بالمناسبة كلما قلت النسبة زادت عتمة التظليل ! مثال 5٪ سيكون التظليل أسود بشكل كبير وصعب تميز من بداخل السيارة ، و أيضا سيكون صعب قيادة السيارة في الليل

 مثال لنوع التظليل للذي إخترته في هذا الفيديو لنفس النوع ولكن النسبة 40٪ :

نرجع إلى الوكيل الرسمي لماركة لومار في الكويت ، ذهبت لهم قبل اسبوعين تقريبا كما قلت و هنا وجدت المفاجأة بحق !! لا يوجد لدبهم النوع الذي اسأل عنه والذي طلبته CTX بل إن المالك وجدته متواجد و أخبرني بكل ثقة أنه لا يوجد هذا النوع ! وفقط يوجد أنواع ( كما يزعم ) من نوع ATC و ATR و AIR BLUE 80 وهنا استغربت من عدم معرفة الوكيل بأنواع أخرى غير التي يبيعها للناس عندنا ! مع العلم يوجد نوع يعتبر الأفضل في سلسلة ماركة لومار وهو الموديل Wincos

قلت للمالك أنا متأكد مما أقول وجعلته يدخل إلى موقع الشركة حتى يتأكد بنفسه ، وعلشان يتهرب من الإحراج قال لي ضع تلفونك لدينا وستقوم بالإتصال بك حال توفره لديهم ! نعم سيقوم بطلبه مثل ما طلبته أنا الآن

عموما سألته عن سعر التظلبل لسيارتي بالنوع الذي يملكه حاليا ؟ فقال لي بداية أنه سيكلفني 220 دينار كويتي فقط لا غير ههه قلت له ماذا تقول أنت ؟ فعندما عرف أني عرفت بأمر الأسعار و الأنواع ، عمل لي خصم لحظي 40 دينار مرة واحدة !! أي ان السعر النهائي أصبح  180 دينار كويتي أي ما يعادل 665 دولار أمريكي

طيب كم سعر الشراء يا هورنت من أمريكا ؟ الإجابة ستكون في الصورة التالية :

طبعا السعر يشمل الآتي :

  • الشحن الداخلي الى حساب أرامكس 12 دولار
  • قمت بطلب عدة التركيب بسعر 24 دولار لأني أنوي التركيب بنفسي

يعني لو استثنينا سعر الشحن والعدة التي طلبتها سيكون السعر 108 دولار ، أي ما يعادل 29 دينار فقط لا غير ، ولكن خلونا على السعر الذي قمت بدفعه بالكامل و سأضيف من عندي هدية 10 دنانير لشحن أرامكس للكويت ، فكم وفرت عن الوكيل و بنوعية ليست متوفرة عنده ؟ أترك الحكم لكم

مازال الكثير من الوكلاء يعتقدون أن الإنترنت غير متوفر لكي نتعرف على الأسعار و بالتالي يستغلون العميل ، وأيضا مازالت الناس تتخوف إلى الآن من التسوق من الخارج أو لا تعرف !!

لا تعرف تركيب التظليل ؟ لا توجد مشكلة ، فهم يوفرون لك دليل التركيب ، و إن أردت خذ التظليل و إذهب إلى أي محل متخصص يركبه له بسعر لا يذكر

المضحك في الموضوع أني عندما قلت لوكيل لومار في الكويت ماذا لو قمت أنا بطلب المنتج من أمريكا و أردت تركيبه لديكم ؟ قال لي لا نستطيع أن نركبه لك !! طبعا لأني لم اشتري منهم التظليل الرخيص بسعر غالي لكي يربحوا أكثر !!

بكل الأحوال أنا أضع لكم تجربتي خصوصا لمن يود أن يضع تظليل حراري لسيارته ، نعم توجد ماركات أخرى ولكن أنا أتكلم عن جشع الوكلاء لدينا في الكويت ، فأقل شركة تركب تظليل حراري من الماركات المعروفة يكون بحدود 160 دينار وهذا سعر مبالغ فيه جدا جدا على تظليل للسيارة

بدون شك بعد وصول الطلبية سأقوم بتركيب التظليل بنفسي و سأضع لكم تجربتي و إنطباعي في موضوع آخر إن شاء الله

معلومات تفيدك :

الموقع الذي قمت بالشراء منه يعتبر ( موزع ) لماركة لومار و ماركات أخرى أيضا ، ويقومون بقص التظليل ( بالكمبيوتر ) لموديل سيارتك بالحجم المطلوب تماما ، ستصلك الطلبية عبارة عن قطع جاهزة كل ماعليك فعله هو نزعها وتركيبها مباشرة على زجاج السيارة بسهولة ، يوجد مع الطلبية تعليمات التركيب

 ويوجد في اليوتيوب الكثير من دروس التركيب ، الموضوع سهل و بنفس الوقت مسلي إن أحببت ، فلم لا تجرب بنفسك ؟ الموقع الذي تم الشراء منه على هذا الرابط ، قم بإختيار نوع سيارتك والموديل و أختر ما تراه مناسب لك

تحديث 1/9/2011 : هذا رابط من الأخ رامي وضعه في الردود في الأسفل لتجربته الشخصية للطلب والشراء والتركيب ، وضعته لمن يود الإستفادة أكثر على هذا الرابط

134 تعليق

  1. اول شي عيدك مبارك

    ثاني شي حبيت اقولك ترى في اماكن ثانيه بنظري احسن من المحل اللي رحتله و واحد منهم

    Foil Art
    زورهم يمكن تلقى طلبك

    https://www.facebook.com/profile.php?id=100001763253903

    • عساك من عوادة
      لم ازر هذا المحل ولكن زرت لومار و في كول وانصدمت من الأسعار ورجعت البيت ، اعتقد ان المحل الي ذكرته لا يختلف في أسعاره عن المحلات الأخرى
      تحياتي لك وأشكرك على النصيحة

      • ونسيت اعايد عليك
        عيدك مبارك يابوناصر
        وعساك من عواده وتقبل الله طاعتج
        بس لاتنسى توقع
        daily and turnaround
        عندي بال m/c
        هههههههه

    • عساك من عوادة

      تكفون مو فويل ارت …….. زرت هل المحل و كل مسكر و بعدين حصلت و احد بليل و عطاني نفس الاسعار بس بدون ماركه و يقول سيراميك امريكي و ايفرق بين انواع العزل و اشلون طريقه الغزل الحراري ……

      انصح في فويل سنتر وووايد ارخص و افهم

  2. بداية كل عام وانت بخير عزيزي

    طيب فيه نقطة كثييير يغفلون عنها

    اللي هي التبليغ عن هالوكالة واسعارها للشركة الأم

    اتمنى بما انه عندك القدرة على التواصل معهم تبلغهم باللي حصل وتذكر لهم الاسعار بالدولار
    وتطلب منهم يعطون الوكالة الى الشخص اللي يستحقها

    اما بهالحاله للأسف ماراح يدرون عنه وهو راح يستمر على نصبه وجشعه الله يصلح قلبه

    • صادق والله
      سأقوم مراسلة الشركة الأم بخصوص هذا الموضوع إن شاء الله
      تحياتي لك

      • يا جماعه انا كلمت الشركه الام وقالو لي ما يبيعون للكويت
        يقولون في اتفاقيه هذه اسعار الشرق الاوسط
        يعني شارع الزينه هو الحل الارخص
        لوووووول

  3. عيدك مبارك بو ناصر وكل عام وأنت بخير
    والله يا بو ناصر حدك حدك حدك صدمتني بفرق السعر
    الله لا يوفق كل تاجر يتلاعب على الناس !

    • عيدك مبارك يا فيصل
      لو تعرف سعر ( الرول ) كامل والذي يكفي لعدد 6 سيارات بكم !!
      نعم أقل من سعر الوكيل لتظليل سيارة واحدة
      تحياتي

      • لا حول ولا قوة إلا بالله
        ( يا أيها الذين آمنوا لا تأكلوا أموالكم بينكم بالباطل ) ..

        • علي حسين

          بسكم حسد يا كويتين …….. مليون محل
          شل هبه
          بس البقاا للافضل

  4. كل عام وانت بخير يابو ناصر

    ايوا هذه المواضيع اللي تبرد القلب الله يبرد قلبك

    مو زي ال ٨ مواضيع اللي راحت << شكله بيتصفق خ خ

    عندنا وعندك خير يابو ناصر

    في السعوديه يبيعوها على ١٨٠٠ ريال سعودي
    ولو شريتها من برى ماراح تكلني ٥٠٠ ريال شامله تكاليف الشحن

    • ابشرك تم مراسلة الشركة الأم بالموضوع كاملا
      مرفقا لهم صور و رابط الموضوع لكي يتعرفوا بشكل أفضل عن وكيلهم الرسمي في الكويت وكيف يتصرف على هواه !!
      انتظر ردهم علي وسيتم تحديث الموضوع في حال ورود رد طيب إن شاء الله
      تحياتي

  5. حلوين 🙂 زين وين وشلون اسجل بأرامكس 🙂 ابي صندقو بشتري من برا شغلات واااجد 🙂 ههههههههه يالله يا اخ بدر نورنا ان كان عندك موضوع قديم او موضوع جديد تعلمنا شلون وبكم نفتح صندوق وشلون توصل البضاعه وكم يوم 🙂 ادري واجد اسأله بس كل شي محدد بخدمه الصندوق ابي معلومات عنه عشان بشتري شغلات 🙂 جزاك الله خير وعيدك مبارك 🙂

  6. يعطيك العافية على الموضوع الرائع ، والله يباركلك بالسيارة ويرزقك خيرها ويكفيك شرها ، فعلا موضوعك جدا مهم بصراحة دورت اي بيان متعلق بتظليل او تعتيم زجاج السيارة وما لقيت شي غير كلام الناس انه النسبة المسموحة هيا ٥٠ ٪ بس ما لقيت شي رسمي للموضوع فاضطريت لوضع ستاير بدل التظليل ، لان نفس ما قلت التظليل الحراري مكلف جدا في الكويت ، وعجبتني كلمتك ” بما أني لن أحتاج للذهاب إلى الفحص الفني لمدة 3 سنوات ” هذا يعني انك رح تضطر تشيل التظليل الحراري عشان الفحص ، هل رح تقدر ترجعه مره ثانيه ؟؟ في مخالفة عليه ؟؟ السيارات الي جايه من امريكا مظللة وخالصة تترخص بسهولة ؟؟ سامحنا على إزعاجك  

    • شخصيا مظلل سيارتي بنسبة 50% وعادي التأمين مايقول شي ابدا

      • الخوف مو من التأمين ولا من الفاحص الفني اللي ممكن يكون واسطة ويمشيك

        الخوف من شرطي المرور يشوفك بالشراع ويخالفك

        50% مخالف
        30%مخالف
        15% على المزاج والدرجة بليل

        وطبعا اذا تعرف واحد واسطة يمشيك اذا ماتعرف فراح تطلع قيمة التظليل عشرات الادبال

        • أخوي فرانكوم

          كلامك 100% صحيح

          خالي ( معاه لومينا موديل 2010 ) كان حاط ستاير على سيارته الصالون ( الستاير الي تنحط وتنشال ) وحاط استكر على الجناح ( فقط لوووون اسود ) من غير اي اشكال ولا عبارات , وحاط كلمة (ما شاء الله) على السيارة , الشرطي وقفه وسحب منه الرخصه والمخالفة (تظليل زجاج السيارة ووضع استكر بشكل يغير من لون السيارة !!!)

      • أخوي بو فلان

        انا كان معي تاهو موديل 2002 مظلل اقل من 50 % ويوم الترخيص ما رضي الفاحص الفني يمشيه والسبب اعذرني على الكلمة ( بس يمكن لأني مقيم )

        وفي حالة ثانيه واحد من الربع عنده بعد تاهو بس وارد امريكا والزجاج معتم من امريكا حراري اصلا

        والفاحص الفني ما رضي يمشيه بعد , راح الشب مسك ولاعه وحطها على الدريشه عشان يوريه انه مو تظليل استكر

  7. يعطيك العافية اخوي هورنت على الموضوع صراحة فدتني فيه كثير

    كنت بطلب تظليل حراري من النت بس كنت غشيم بالنوعيات فركبت واحد من لومار وريحت راسي

    وبعد موضوعك هذا انسى اقرب صوب الوكالات هاذي خلاص شغلي كله من النت

    • مستقبلا قبل الذهاب للوكلاء القي نظرة على النت
      وكلنا مررنا بنفس الي مررت فيه مع الأسف

  8. وعفوا اخوي هورنت نسيت اعلق على شغله انت ذكرتها

    “مثال 5٪ سيكون التظليل أسود بشكل كبير وصعب تميز من بداخل السيارة ، و أيضا سيكون صعب قيادة السيارة في الليل”

    انا مظلل فل .. الي برا ما يقدر يشوفك بس انت تشوف عادي بشكل واضح حتى بليل

    ولحد يقارن تظليل شارع الزينة مع تظليل لامار!! التظليل البوطقه مال شارع الزينه لا انت ولا الي برا تقدرون تشوفون شي .. على عكس لومار (وفي كول وغيره من الانواع الممتازة) الي برا ما يقدر يشوفك بس انت تقدر تشوف (طبعا الله يعينك على المخالفات اذا حطيت هالنوع 😀 )

  9. موضوع رااااااائع جدا جدا

    وشكلي بلحقك وبطلب لسيارتي بس عسى احصل الموديل نفسه عندهم

    بانتظار تجربة التركيب وخل يستريح لومار الكويت

    في احد يربح خمس اضعاف السعر يخرب بيت الطمع

    • احمد العازمي

      يا عزيز ابو فلان احنا مشتركين معاه بالجريمه والجشع يقول المثل السكوت علامه الرضا احنا نشوف ملاين النصابين والطماعين حتي بالجمعيات بس محد اعترض عالسعر معناه اننا راضين باللي يصير هذا المفهوم اللي صار وراح اضربلك مثال بسيط تتذكرون سالفه واجتماع وكلاء جنرال موتورز في دبي والمقوله الشهيره اللي قالها الوكيل الناس راضيه بالسعر وقاعده تشتري ليش انزل السعر

    • تسلملي بوفلان
      دور في موقعهم او في مواقع ثانية إن شاء الله بتحصل
      او خلنا ناخذ رول كامل و نركبه لسياراتنا عند محلات الزينة
      تراه تظليل عادي و الناس مكبرة السالفة انه له طريقة و فلم هندي 🙂
      نعم هذا الي حاصل من الوكيل عندنا واسعاره المبالغ فيها

  10. يعطيك العافيه علي الموضوع الي بين لنا شغلات متجاهلينها

    هذا موقع الشركه

    http://llumar.com/en/Products.aspx

  11. عمرك طويل ان شاءالله

    أمس قايل أبي أكتب بوست عن التظليل وأشوف راي الناس
    كفيت ووفيت 🙂

    الحين أنا اخترت لومار وقالولي 160 دينار كويتي حق سيارتي كلها مع التركيب
    بس الحين أبي أطلب من الانترنت وأبي محل في شارع الزينة يركبه لي
    عموما أنا أبي النسبة 15% وأبي شي ممتاز شنو تنصح ومابي شي يكون غامق والحرارة تنعزل ؟ ومن وين أطلبه ؟

    • صدقني تراه تظليل عادي من ناحية التركيب نفس الي ينباع في شارع الزينة
      طبعا المواصفات الي يحتويها التظليل هي الي تفرق
      لا تسمع كلام الناس الي تقول انه تركيبه صعب ، تراه تظليل لا أكثر اي شخص يسويه لك ، واليوتيوب مليان مقاطع لناس تركبه بنفسها بإتباع تعليمات التركيب ، او مثل ما قلت اخذه لمحل في شارع الزينة يركبه لك إذا ماتعرف
      النسبة الي تبيها اشوفها غامقة جدا و ممكن تتسبب لك بمخالفات ، اعتقد 35 – 50 ٪ تكون في منطقة الأمان
      اقرأ عن مواصفات كل نوع و شنو يقدم لك من عزل حراري الخ الخ
      تحياتي لك

      • ممكن الرابط للموقع ؟

      • حمد الكندري

        خافو ربكم ….. تركيبه حده صعب و محتاج مسدس حراري ……و امواس خاصه
        دام السالفه جذي …… منو احسن ماركه

        حسب قول الامريكان في منتدى Tint dude :

        لومار ثم سولر جارد ثم 3M

        • اخوي حمد مساك الله بالخير
          الي في الموضوع لو منتبه شوي يوصلك مقصوص جاهز لنوع السيارة بالليزر
          يعني فك وركب سهالة ما يبي شي
          المسدس الحراري للجامات الي تكون فيها انحناء والعادة تكون الخلفية والامامية
          يتم تعويض المسدس الحراري بالسشوار عادي جدا
          عموما انتظر موضوعي عن تركيب التظليل قريبا ان شاء الله هاليومين
          تحياتي

  12. احمد العازمي

    كل عام وانت بخير اخي هورنت والف مبروك عالسياره اسال الله العلي القدير ان يباركلك فيها وانا عندي تاهو ٢٠٠٩ هم طلبتله من بره تظليل وركبته انا واحد من الربع وكان التركيب جدا سهل والحمدلله بعد التجربه الان لي ٣ سنوات ممتاز لدرجة ان المكيف اقصر عليه اقل درجة من البرد التظليل الحراري اي كانت ماركته تاكد من شغلتين مهمين الصناعه امريكي وتقنيه الناتو ويكون 3M انا ركزت عالهمواصفات والحمدلله مرتاح مع التظليل واللي ماخذة انا الخفيف كانك مو حاط تظليل كلف علي ٢٢٠ دولار مع شحن ارامكس شوي غالي بس انا اخترت الشفاف اما الدرجات الاخري ارخص بس معروف التظليل كل ما كان شفاف كل مازاد سعره والف مبروك وكل عام وانتا بخير

    • مرحبا احمد
      طمنتني بخصوص التركيب ، مع اني شفت مقاطع في اليوتيوب لسهولة تركيبه ، خصوصا ان الي راح يوصلني مقطع وخالص
      انا نفسك كنت ناوي آخذ تقريبا شفاف ولكن استقر الرأي على لون مقارب للون سيارتي الأسود
      والله يبارك فيك وعيدك مبارك

  13. ابراهيم الظفيري

    مرحبا عزيزي
    اولا مبروك التضليل
    وحبيت اقولك انا سبقتك وركبته قبل ثلاث اسابيع
    هم حق تاهو وركبته ب ١٥ دينار تركيب احترافي الصراحه
    ركبت نوع ٥٠٪. صراحه ممتاز ومو مبين للشرطه
    كانك مو مركبه لكم للاسف الموقع ما وفر لي الجام الامام
    اذا تبي ادليك على المحل حاضر

  14. كل عام وانتا بخير..

    انا شهر 5 رحت لـVcool اركب وقال لي على ما اذكر لجيبي البليزر 210 دينار!

    واستسلمت .. ولما رحت لـVcool ودخلت سيارتي .. قال لي العامل”انتا واصل؟” قلت له شنو تقصد؟ قال ترى كل هالسيارات اللي امامك اللي ظللناها اصحابها واصلين بالداخليه يعني ما عندهم مشكله بالفحص الفني.. قلت له ركب لي العازل الشفاف جداً قال حتى الشفاف ما يطوف الفحص الفني!

    وطلعت ورحت شارع الزينه وركبت تظليل خام وتظليل جلاد اي كلام.. والسياره فرن بالصيف

    ملاحظة: انا دخلت الموقع ولكني خيارات طلبية التظليل معقده لم افهم بعضها يريت لو تترجم الخيارات نبي نطلب منهم 🙁
    يوصلون لأرامكس امريكا؟
    http://www.tintzoom.com/product-p/wtk-1432.htm

    • بوحمد اذا اللغة مو مظبوطة معاك استخدم ترجمة قوقل مثلا
      ولو ان الطلب سهل جدا ومافيه تعقيد ، تحتار النوع / درجة التعتيم / مواصفات اخرى اذا تحب
      نعم يوصلون لأرامكس وهذا الي انا سويته

  15. والله زين تسوي كشت فيهم وطلبته من بره.
    ومشكور على البوست المفيد ولو أنا منك أسويله برنت وأعطيه الوكاله بالكويت
    صراحه إنصدمت من حجم هامش الربح إللي ياخذونه بالكويت
    مادري متى تجارنا يشبعون ومادري متى يوقفون نصب وبوق على الناس
    قواك الله

    • ان شاء الله الكل يستفيد و يوصل خبر للوكيل ان الناس تعرف شلون تطلب من برا
      والي يبي يركب عنده له حرية القرار
      بس لو تطلب 5 انواع تظليل من برا وتقعد تخرب فيهم على راحتك ما توصل لسعر الي تركبه عند الوكيل 🙂
      تحياتي

  16. مسأله الشراء مثدور عليها المسأله منو يركبه لك ابسعر ممتاز وتركيب احترافي؟

  17. اول شي عدكم مبارك جميعا و عساكم من عواده

    الصراحه انا كان في بالي من زمان اني اظلل السياره و لكن الاسعار جدا غاليه خصوصا من
    ( في كول ) .. الانترنت اصبح كابوس بالنسبه لجشع التجار و العتب الاكبر على وزاره التجاره لعدم مراقبه الاسعار … عموما مشكور يا هورنت على هالمواضيع الي يبرد الجبد في هذا الصيف الحار .. تحياتي لك

    • عيدك مبارك
      كلامك صحيح الإنترنت فتح لنا ابواب و خيارات كثيرة
      والعفو وحياك الله

  18. موضوع متميز!
    أتوقع بعد هالموضوع المثير يا بوناصر نطالبك بالتالي:
    موضوع يشرح أنواع التظليل ، وكيفية الطلب من الموقع

    وأنا أبشرك ان الزمن والجيل يتغير، والتاجر الطماع ماله مكان
    يؤسفني ان فلوسنا تروح لبره بسبب هالأشكال من التجار
    لكن الواحد يدور مصلحته في البداية.

    • ++++1

    • ذكرت يا عبدالله اني راح اركب التظليل بنفسي
      ان شاء الله راح ( اوثق ) العملية ههه علشان اشجع الناس مثلي
      الله المستعان هذا الي حاصل بالديرة مع الأسف
      تحياتي

  19. طول عمرك متألق بمواضيعك المفيده ياهورنت
    تسلم على هالموضوع الحلو والمفيد

  20. طول عمرك متألق بمواضيعك الحلوه ياهورنت
    تسلم على هالموضوع الحلو والمفيد للجميع
    وماعندنا رد الا الله المستعان على هالطمع والجشع الموطبيعي عند بعض التجار

  21. السلام عليكم …

    جزاك الله ألف خير والله .. طرح توعوي و متميز الله ينفعك مثل ما نفعتنا

    جان زين تكون فيه مدونه خاصه لفضح الوكلاء الجشعين ..

    حرام … ياخذونها من حلج عيالنا لي بطونهم اللي ما تنترس إلا بالصخر

    أذكر كل تاجر جشع بقول الله تعالى ” أَلَا يَظُنُّ أُولَئِكَ أَنَّهُمْ مَبْعُوثُونَ (4) لِيَوْمٍ عَظِيمٍ (5) يَوْمَ يَقُومُ النَّاسُ لِرَبِّ الْعَالَمِينَ”

    الله ينتقم من كل ظالم .. طال الزمن أو قصر!

  22. أبو أفنان

    موضوع جدا راقي وممتاز ، انا قبل جم يوم قريت تجربة أحد السعوديين في أحد المنتديات مع التضليل لكن الي طلبه كان رول كامل والسعر كان تقريبا 700 ريال واصل ، لكنه تبهذل على ما لقى احد يركبه له ، وكتبت تجربته والموقع ، لكني ما تشجعت له.

    لكن بعد موضوعك رجع لي الحماس وراح انطر الى نهاية تجربتك بعد ما يوصل التظليل وتركبه وتعطينا انطباعك خصوصا موضوع انك بتركبه بنفسك خلنا نشوف اذا العملية سهلة او نحتاج نبحث عن محل بالصناعية يكفينا هالموضوع .

    شكرا لك يا بوناصر وعساك على القوة 🙂

    • هلا بو افنان
      صدقني تراه تظليل عادي وتركيبه سهل ، نفس تركيب التظليل في شارع الزينة
      ان شاء الله بتشوف موضوع ثاني عن التركيب خصوصا انه راح يوصلني مقطع و جاهز للتركيب
      اما بخصوص اذا رول كامل وهذا الي راح نسويه انا والربع فالموضوع سهل ! شوف هذا متخصص تركيب تظلبل لومار من الرول مباشرة للسيارة
      http://www.youtube.com/user/TintStuff

  23. موضوعك جيد وانا شخصيا مركب عندهم من 3 سنين 30% كان 120 دينار بس ماعرف اي نوع من اللي ذكرته ياخوي.. عموما حركه حلوه انك سألت بالموقع وعرفت الاسعار بس المشكله الحين الشرطه تخالفنا وماتخالف هالشركات والمحلات ومحد راضي يفهم جو ديرتنا يبيله دبل من هالتغييم الحراري

  24. هورنت انا ابي تظليل شفافي شنو تنصحني فيه من الموقعAIRBLUE?

    • كما قرأت فإن التظليل الشفاف ( اير بلو ) على الرغم من انه شفاف إلا انه يعزل حرارة أكثر
      اذا عاجبك اخذه لا تفكر !!
      تدري شلون اطلب 3 انواع مختلفة هم ماراح توصل لربع سعر الوكيل عندنا ههه
      تحياتي

      • ههههههههههههه اي والله صادق عاد ريحت قلبي خلاص بتوكل واشتريه بس الغريب حييييييييييل رخيص 40 دولار+ 12 دينار

        والله انك حبيب يا هورنت افضحه الجشعين اكثر وننطر تجربتك ^_^

  25. كل عام وانت بخير اخي

    نفس موضوعك بالضبط ولكن انا انصدمت ولغيت الفكرة

    ولكن بعد موضوعك رجعت وفعلت عنواني بالارمكس وانشاء الله سوف يتم الشراء لكن التركيب عليك بالعدة 🙂 (ماراح اغامر مع مبتدء )

    • شدعوة انا الي متعود على تركيب التظليل بنفسي هه
      توكل على الله واخذ (اذا) بخاطرك
      انا عن نفسي ما انتظر اجرب على طول
      إن شاء الله انه سهالة التركيب ، وفي رد فوق يقول انه ركبه بنفسه وجدا سهل
      تحياتي

  26. عذرا نسيت ………..ما في عندهم اخي الحماية اذا ممكن تفيدنا بالرابط
    واذا ممكن الرابط الخاص بالتظليل الحراي نفس مواصفات سياراتك

  27. السلام عليكم
    كيف الحال يابوناصر
    جزاك الله خير موضوعك هذا فادني واجد
    لاني من زمان افكر اركب التظليل بس الصراحه اشوف السعر مبالغ فيه علما ان البديل هو الباغات الي تركب على الجام
    وانا ركبت حمايه اماميه لليوكن في شهر يناير تقريبا ٤٠٠ دينار حمايه كامله
    وادري انهم بالعين نص السعر بس مافي بديل وتركيبه اصعب اعتقد بالحراره
    عموما اشكرك وارجو انك دائما تفيدنا بمتجاربك

    • وعليكم السلام ورحمة الله وبركاته
      هلا بوفهد
      وياك ان شاء الله
      انا مثلك مركب باقات حاليا ، بس قلت خلني اجرب التظليل الحراري و مثل ما شفت في بقية الموضوع …
      بيني وبينك مستحيل ادفع هالمبلغ الي دفعته في الحماية ، مو بخل !! لأني مقتنع انه سعر مبالغ فيه وادري انه في بدائل مثل ما طحت على التظليل الحراري راح اطيح على الحماية وهم راح اطلب و ابلغكم إن شاء الله

      • الحمايه الي انا مركبها
        غطاء الماكينه+المداقر+الدعاميه الاماميه+المناظر الجانبيه+الابواب الي يصير بنهاية الباب

        ادري انا مبالغ فيه جدا ولكن لان اذا سافرت مااحاتي نهائيا

        وفي رمضان كنت على الدائري السابع ولا نساف محمل صخر والحبيب مو مغطيه ولا تشوف الناس تروح يمين ويسار من الصلبوخ

        وانا مو منتبه وطعت فيها طبعا الاضرار كسر بالجام الامامي علما ان جام المصنع مايتعوض حتى لو كان وكاله
        وايضا لو تشوف غطاء المحرك من الصلبوخ مثل الحبوب او النمش ماادري اشلون اوصفه لك وفي شلخ بسيط بالبلاستك

        وبما ان في كقاله بوديها لهم يغيرونه

        يعني مثل هذا الموقف الي من اول ماسقت سياره ما مر علي نهائيا وقدر الله وصار وياي لو اني مو مركب حمايه اتوقع ان السيارتي الي عدادها الان ١٣ الف كيلو ماراح تسوى شي لا بالشكل ولا بالقيمه

        اسف على الاطاله وشكرا مره اخرى

  28. مبروك يابوناصر
    بس في سؤال هل درجة التضليل اللي اخترتها مسموحه بالمرور
    ولا يخالفونcTX (Nano-Ceramic) 35%
    انا بشتري بس ناطر افادتك
    ولكن من اي بيه
    ارخص
    الرابط

    مشكور

    • يبارك بعمرك
      اممم والله اشك انه مسموح في المرور ، ولكن 50٪ مسموح لأنه تقريبا مايبين انك حاط تظليل
      الله يبارك لك من وين ما خذيت ، وهذا رابط آخر من نفس الموقع الي انا طلبت منه لمزيد من الخيارات بالنسبة لك
      http://www.tintzoom.com/product-p/wtk-7530.htm

  29. انا ركبت امريكي ماركة suntek ماركه حلوه ومعروفه من شركة الغانم لما خذت السياره بي ١٠٠ دينار من كم شهر لنفس موديل سيارتك مع كفاله ٣ سنوات

    البيبان الاربع مع الجامات الجانبيه نفس تضليلك

    والاماميه والخلفيه الدرجه الي اقل منها عشان المرور والتفتيش والدوريات لانهم يخالفونك ان شافو التضليل
    لانه ممنوع بكل انواعه واحد من الشباب رصوه ٣ مخالفات باسبوع

    زين ماخذو وايد كانوا الارخص بالسوق

    المره اليايه بسوي نفسك من امريكا

    • اول مرة اعرف ان الغانم عندهم تظليل ! غصب يبون يربحون بأي طريقة ممكنة
      بالنسبة لي هذي اول مرة راح تكون استخدم التظليل الحراري
      والله يوفقك في حال نويت تاخذ من برا
      تحياتي

    • علي حسين

      الله يهديك و يعوضك
      سن تك صيني نفس شارع الزينه
      وتكلفته ٦ دينار للسياره
      اسال الغانم وين يركب الملاك سياراتهم
      ؛)

  30. عاد انا وايد رحت استفسرت عن التظليل وكانت دايما الاسعار فوق ال 120 دينار رغم ان السيارة كوبيه يعني بس جامتين !

    صج لازم نتوعى من هالاشياء !

  31. عيدك مبارك ومشكور على الموضوع ،بس اهم شي انه الكل كان بركب ههه 🙂

  32. Rami H AlSubhi

    نعم جميل جدا

    قمت بعمل تقرير عنه قبل خمس اشهر
    http://www.adslgate.com/dsl/showthread.php?t=910086

    ليتك جربت الاير بلو 80 للزجاج الامامي ع الاقل

    • مرحبا اخ رامي
      نعم اذكر واحد من الربع اعطاني رابط موضوعك والقيت نظرة عليه ، عمل رائع منك ،،،
      الله يذكرك بالشهادة ، بعد اذنك راح اضع رابط لموضوعك في الموضوع فوق لمزيد من الفائدة
      تحياتي لك

  33. حسن المطيري

    مشكور على الموضوع المميز والمبدع ولكن نحتاج أحد يبسط لنا في شرح كيفية الشراء واختيار الأنواع المعروضة
    الله يعطيك العافية ويباركلك في السيارة الجديدة إن شاء الله

  34. اخوي بدر

    بيض الله وجهك من قلب !
    شنو فرق السعر اللي صج صج مو طبيعي !
    ياخي انا مستغرب
    بالبحرين والسعودية تلاقي التغييم منتشر بين عوام الناس , وبسياراتهم العادية هنيه بس المواتر والدفيعة اللي عندهم تغييم !
    وطول الوقت مستغرب توقعت ارخص شوي عندهم بس مو أرخص للهدرجة !
    الله المستعان
    جاري توزيع موضوعك على الشباب للإستفادة

  35. محمد الديحاني

    بارك الله فيك اخوي
    والله يجزاك عنا خير الجزاء
    عاد كنت ناوي اركب هاليومين بس الظاهر بطلب من امريكا واركب بالصناعيه
    والله يهدي هالوكلاء والله مصو دمنا ،،،

  36. مشكور يا هورنت نورتنا
    اتوقع العبالة راح تكون بتركيب الزجاج الامامي كونه كبير ومائل

  37. السلام عليكم. عيدك مبارك يا هورنت.. انا من زمان معجب بمقالاتك خاصه عن منتجات الماك. المهم كلامك صحيح . من ناحية الجشع. والشي الثاني الأحلى. قولك: انك تربكهم بنفسك فهي مسليه: انت تشجع على العمل مو على الكسل بارك الله فيك

    المهم . قضية الي ذكرتها في المقال نفس قضية الانتر نت عندنا بالكويت. غالي مع انه في الدول الاوربية سرعة 24 ميغا لمدة سنة بسعر تافه جدا. وتعال عندنا بالكويت سرعة 1 ميغا 24 دك. شي مبالغ فيه 🙂 وشكرا لك وانا احب اقرا مقالاتك وموقعك واو سهل وجميل والسلام عليكم.

  38. تم الطلب
    ١٦٧.٢٥ دولار
    نفس النوع الي طلبته يابوناصر ولكن النسبه ٥٠٪
    + عدت التركيب + ١٢ دولار التوصله لبريدي بارامكس
    ويضاف على السعر قيمة الشحن لارامكس
    ووداعا لجشع وطمع التجار الغريب والغريد مبرر والغير محدود
    والف شكر لك يابوناصر انك نبهتنا وعلمتنا والشكر موصول ايضا للاخ رامي على الشرح
    وان شاء الله بيكون في تقرير كامل للتركيب ان امكن ذلك

    • بالمبارك يا بوفهد
      انا الشحنة توصلني بكرة و بشوف اذا التغيم غامق راح اطلب نفس الي طلبته انت وهو افتح بكثير وكنت محتار اخذه
      موفق خير دائما

      • الله يبارك فيك يابوناصر
        وان شاء الله بطلب لواحد من الربع
        الصراحه لازم تاخذ عمومله على الشركه 🙂
        واحنا بانتاظر تجربتك …

  39. موضوع ممتاز ومفيد.الله اعتيك الصحة والعافية.لك مني اجمل التحية.

  40. سلام عليكم

    وايد مشكورين على هل تفاصيل بس للاسف في الكويت ما في ماركه محترمه غير لومار و في كول …….. انا جربت الاثنين …….. صج صج الاثنين ممتازين و انصح فيهم الهم فرق 10 دينار بين الاثنين . سياراتي كانت يوكن و الثانيه لاند كروزر و سويت الاند عند لومار حسب توصيه من شباب الحمايه

    بالنسبه حق باجي المحلات فاغلبهم صناعات من شرق اسيه و اسعارهم غاليه وايد على الطل و يقلدون في كول و لومار

  41. يعطيك العافية وماتقصر يابوناصر وبنتظار جديدك

    مزاد الكويت ^_^

  42. اخوي هورنت … لمن ركبته ضبط وياك اطراف الجام مالت السايق .. يعني مو تنزل الجامه تلاقي طبقه من الجام ماعليها تظليل وبعدين يبتدي التظليل؟

    منو ركبها لك ؟ في احد شاطر يركبها

    اكون شاكرلك

    • هلا اخوي محمد
      تأخرت الطلبية وإن شاء الله استلمها بالكثير الأحد
      فاهم قصدك … بس بناء على قص التظليل بالكمبيوتر راح يكون لكامل الجام بدون مسافة إن شاء الله
      أنا راح أركب التظليل بنفسي ، وراح اضع في موضوع آخر تجربتي لأني أحب اشتغل بنفسي و أتقن العمل اليدوي ولله الحمد
      انتظر الأيام القادمة وراح تعرف كل شيء بالتفاصيل
      تحياتي

  43. اخوي هورنت .. دير بالك تستخدم السشوار ترى يخرب الفلم عليك .. لازم الهيتر (المسدس) .. والجيد بالموقع .. نزل air blue 80
    نسبة الرؤية ٨٠٪ وسراميك .. وبنفس الوقت الحرارة يحميك منها ٤٣٪
    وممكن تطلب القطعه الي جدام ويكلفك ٣٤ دولار
    يابلاش

    • وانا اشوف الجامه الخلفيه باليوتيوب يغيمونها من بره … بس الشركات الي بالكويت يغيمونها من داخل … الله يسامحك ياخوي هورنت .. حمستنا

      • الي تشوفه وقت ما يسخنون الفلم علشان ياخذ شكل الجام بعدين يركبونه من داخل ، علبالك شغل شارع الزينة عندنا ههه
        جرب ياخوي ترا كله تظليل سهالات بس المشكلة ان الناس ماخذين فكرة غلط انه شيء واااو صعب !! سهالة عمي صدقني
        تحياتي

  44. مشكوووووور ويعطيك الف عافية على هالموضوع
    دورت بالموقع بس ما لقيت موديل سيارتي واتمنى لو تفيدني والله محتااج التظليل لدرجة ما تصورها كل يوم دوامي امشي 50 كيلو بهالحر ومن زمان افكر اظلل حراري
    انا عندي حساب بارامكس واعرف اشتري بس ابي تظليل حق كابرس 2008 ltz دورت بالموع الي فوق وما لقيت وابي نوعية بس حق الشمس عادي شفافة يعني 50% زين

    • هلا اخوي فهد
      لان الشفر هذا ما نزل عندهم في امريكا وعلشان جذي مايعرفونه اصلا
      اعتقد مالك الا تشتري رول وتركبه بالديرة عند محلات ، ترا تظليل عادي بس الناس مكبرين السالفة حوله
      موفق

      • انزين من وين اشتري الرول ؟؟
        بس لو تعطيني الرابط اكون شاكرلك
        تقصد هذا http://www.tintzoom.com/category-s/1332.htm ؟
        ابي واحد يكون 50% بس يعزل الحرارة باكبر درجة ممكنة مو مهم السعر

      • طلعلي الخيارات هذي

        Vehicle Year:*:

        Vehicle Make (Dodge):*:

        Vehicle Model (Charger):*:

        Model Trim (2DR/4DR/Hatch):*:
        سنة والنوع والماركة والاخيرة بابين او 4 معناتها يقصون حق اي سيارة ؟؟

  45. يعطيك العافيه اخوي هورنت .. انا طلبت امس حق 4 سيارات .. وطلبت العده ال Professional
    وناطر تجربتك …

    ماقصرت على هالموضوع

  46. تم التركيب
    عنوان المحل الشويخ الصناعيه شارع الزينه
    الوصف
    وانت داخل من شارع الزينه
    ثاني لفه على اليمين
    بعدين ثاني تقاطع يكون المحل على اليمين لوحه صفراء واضحه
    اسم المحل بروفيشنال كول
    تليفون 50040640 ابوطلال

    تركيبهم وشغلهم محترف

    تكلفت التركيب ٢٥ دينار كويتي وبعد الخصم ٢٠

    جزاك الله خير يابوناصر وبيض الله وجهك
    اسال الله ان يقيك حر وعذاب جهنم مثل ماساعدتنا على تخفيف حر الصيف

    • ممتاز
      يعني على كلامك تركيبهم احترافي و ما تنقد عليهم بشي ؟
      يعطيك العافية على الافادة بتجربتك
      ويقعد لومار الكويت 🙂

      • نعم احترافي
        ولكن يبقى السعر مبالغ فيه مع العلم ان التظليل مقصوص بحجم جميع جام السياره،،،
        الحمد لله على كل حال تعودنا بالكويت على المبالغه بالاسعار،،
        فعلا خل يقعد ويستريح الاستاذ لومار الكويت 🙂
        وموضوعك هذا نشرته بجميع الطرق والاغلب لم يكن يعلم بهذا الموضوع!!!وانا منهم 🙂

  47. Salman almulla

    هورنت انا الي كلمتك من تويتر عشان العازل الحراري
    بورش كايمن ٢٠٠٨
    رقمي : 90009878

  48. السلام عليكم
    طلبت من الموقع TINTZOOM تظليل CTX 50% حق الجامات اللي جدام بس اللي وصلي حق الاجناب وماعطوني حق الجامه الامامية في احد يعرف شلون اطلب الجامه الامامية ؟

    • الجام الأمامية ما تحصلها لوحدها عند هذا الموقع ، عليك طلب رول لوحده لهذي الجام ، انصحك بإختيار Air Blue 80 للجام الأمامية لأن الشفافية في هذا التظليل كبيرة جدا وتصل 78٪ و بنفس الوقت العزل الحراري كبير فيها
      تأكد أولا من ( عرض ) الجام لسيارتك قبل الطلب ، لأن الجام الأمامية بالعادة تكون عريضة و كبيرة الحجم ، ومن ثم اختر الرول المناسب لك
      تحياتي

  49. جراك الله ألف خير على نشر الموضوع أخ بدر.. جدا استمتعت بقراءته..

  50. مواطن مدني

    الله يعطيك العافية هورنت ماقصرت .. انا رحت لو مار امس وركبت اير بلو 80 على كل السيارة
    وقال لي كلام عجيب عن هالنوع وانه يمنع حوالي 94 % من الاشعة تحت الحمراء ويمنع حوالي 60% من حرارة الشمس .. لكن في الأخير طلبت المعلومات اللي قالها لي وين مكتوبه ورفض يثبتها لي سواء في الفاتورة او يخليني اشوف الرول والكرتون حقه شنو مكتوب فيه
    وعصب الرجال وقال للعمال شيلوها كلها !! بعد ماصارت جاهزه ومركبينها كلها من الساعة عشر الصبح لين الساعة ثلاث العصر ونا ناطر عندهم حسبنا الله ونعم الوكيل
    انا كنت متوقع ان الفاتورة بيكون فيها نوع التضليل والنسب الخاصة فيه لكن انا ماشفت غير اسمي ورقمي وشوية معلومات عن السيارة ووصف اماكن التركيب فقط
    وسألت اللي يشتغل معه قلت ليش مو مكتوب نوعية التضليل ومواصفاته
    رد علي قال ممنوع نذكرها هذي اوامر الشركة ! انا هني بصراحة انصدمت وهذا اللي خلاني اطلب اثبات الكلام اللي قاله لي عن هالنوع وخاصة سالفة 94% و 60 % والنتيجة عصب الرجال وقام يقط كلام ماله سنع وامر العمال يقشعونها ويقول يعني حنا كذابين ؟ وشوف شهادة مركز الابحاث معلقه وانت تشكك في منتجنا .. والعمال يقشعون التضليل في هاللحظة !!
    قلت يارجال انا زبون من حقي اعرف واتاكد من اللي بدفع فيه فلوس ومن واجبك قبل كل شي تحترمنا وتكون صادق معنا وماتقول شي الا وانت متأكد منه والدعوة بسيطة
    ويعلم الله اني راضي عن التضليل حتى لو اختلفت نسبتة الحقيقية عن اللي قالها
    لكن اللي محد يرضاه طريقتهم في التعامل والاسلوب الغريب ..
    يخلون الواحد يشك في انهم مركبين شي مو اصلي مع العلم ان الشركة الام موضحة كل المعلومات في موقعهم !
    طلعت منهم بعد ماشالوا حتى استكرات الوكالة الاصلية !!
    واول ماوصلت البيت واطلب التضليلة من الموقع كاملة مع الامامية : )
    السيارة سكويا 2012 ولكن مع الاسف ماحصلت لنيسان باترول نهائياً ما ادري ليش !
    قلت بالمره اطلب لخوي معي .. اذا احد يعرف من وين احصل للباترول يعلمنا الله يجزاكم خير

    المعذرة اخوي هورنت الحكي واجد هههه بس والله حبيت انبه الاخوان لحد ياخذ كلامهم بدون مايتأكد انه اللي مركبينه هو نفس الكلام اللي اقنعك فيه
    مثال : 94% طلعت الحقيقة 13%
    و
    60% طلعت 43%
    ماكان فيه داعي يزيد في المواصفات من عنده .. وسلامتكم

    • أنا سيارتي فورتشنر 2012 وما كانت موجودة على موقعهم ..
      أرسلت لهم ايميل بالموضوع قالو نظيفها ونرد عليك ..
      أسبوع اثنين ثلاثة ما ردو ..
      ويوم شيكت لقيتها على الموقع .. بس ما عطوني خبر (شي يحرق الأعصاب أكثر من تجربتك ؛) ..
      وجاري الطلب حاليا ..

      عسى الله ييسر لنا أحد كويس يركبها لنا في الرياض ..

  51. فهد عبدالرحمن

    مشكورين. بس. الافلام هذي كفاءتها ليست عاليه. الي بالخليج مصنعه لمواصفات الخليج. هذا الي قالوه الشركه الام يوم راسلتهم. المهم انا عندي رول للبيع.

  52. ابو محمد

    ميزت الوكيل بالكويت التركيب …..للامانه شغلهم بروفاشنل بس سعرهم اشوي عالي. ياريت يوكبون لي الفلم الي طلبته او اي احد يدليني مكان زين

  53. فيصل العجمي

    سلام …… انا طلبت من الموقع وركبته عند شارع الزينه …بس العزل الحراري ما فرق عن شارع الزينه بو ٧ دنانير ؟؟؟؟
    اناكنت امركب من قبل عند الوكيل و الاداء واجد افضل ؟؟؟ شكلهم الموقع الي في امريكا يبيعون نوع ثاني او شي اقل كفائه

    • مشاري العدواني

      السلام عليكم

      اخوي أسمحلي اقولك ان كلامك غير صحيح, التتغييم الي موجود بالموقع نفس التغييم الموجود بالكويت بمركز لومار ( مدير المحل باكستاني ) , وبالعكس الموقع معطيك اختيارات وانواع افضل من الكويت , وانا عن نفسي امغيم سيارتين من الموقع ومع العلم ان كنت امركب التغييم الي بالكويت, بس حبيت ازيد النسبه التغييم وقاعد اوفر في السيارة الواحده مو اقل من 70 دينار عن التغييم بالكويت , وشوف اخونا كويت 500 طلب نفس النوعية الموجوده بالكويت http://kuwait500.com/?p=591

      • سعود المطيري

        التغين الي عل النت من اقل انواع لومار بالعزل و مو مواصفات الخليج ….. شيل عل سايت لومار و شوف الانواع

  54. ااذاااا انا بنت استفدت من هالمووضوووع فما بالك الشبااب :))

    طلبته و ناطره طلبي حديي متشوقه :)))

    يعطيك العافيه

  55. لاهنت يالغالي ابيك تساعدني باخذلي تغيم لسيارتي مكسيما ٢٠١٢ وارجو المساعده .

  56. لاهنت ابي اخذ تغيم لسيارتي مكسيما ٢٠١٢ يليت تساعدني

  57. حمصي من باب السباع

    السلام عليكم ورحمه الله وبركاته
    سيارتي يوكن 2012
    دخلت الموقع بس ما عرفت اشتري دخلت على سيارات يوكن بس طلعلي خيارات
    مافهمت عليهم وخصوصا اني ما اعرف انكليزي واعتمدت على الترجمة الالية
    ما العمل جزاك الله خير

  58. السلام عليكم

    يعطيك العافيه اخوي الصراحه وايد استفدت منك ومن الاخوان في الموضوع الله يجزاكم خير بس ياخوي انا صادفتني مشكله بالدفع ما ادري هل الموقع ما يقبل فيزا انتر نت والا شالسالفه

    هل في طريقه ثانيه للدفع

  59. علي حسن الكندري

    سلام شباب ……… انا شريت من النت وركبت بشارع الزينه حسب توصيه الشباب ولاكن خربوه بالتركيب مو نظيف…..الحين بطلب مره ثانيه وين تنصحون اركب

    والله طلع اغلى من بيع السوق

    • هلا اخوي علي
      يعينك الله اذا طحت لك بعمال عليمية !!

      عموما انا والربع كلنا جربنا محل ممتاز وانصحك فيه

      اسمه بروفيشنال كول ، ادخل من صوب الاهلية بداية شارع الزينة ، بعدين ثاني لفة ادخل يمين وكمل سيدا راح تحصله على يمينك لوحة المحل باللون الاصفر

      شغلهم احترافي لا تحاتي ، وعندهم تظليل حراري اذا ما تبي تطلب من برا ، شوف الي يناسبك

      بالتوفيق

  60. سعود المطيري

    الوكيل الي بالري امسوي عروض يمكن يركب للك …… شغلهم نظيف بس مواعيد