الرئيسية » منوعات » تجربتي في تركيب تظليل لومار الحراري

تجربتي في تركيب تظليل لومار الحراري

بالأمس وصلني تظليل لومار الذي طلبته في هذا الموضوع ، وبعد ساعات قليلة بدأت بتركيبه بنفسي بدون مساعدة من أحد ، وهذي تجربتي لتركيب هذا التظليل الحراري ، هل التركيب صعب ام سهل ؟ تابع معي تجربتي لتتعرف

الإنطباع قبل البدأ في التركيب

هو تظليل عادي جدا حاله حال أي تظليل متوفر في السوق كما يتوفر عند محلات زينة السيارات ، ولكن بدون شك المادة المصنعة منها هذا التظليل هي التي تفرق ، و أقصد من كلامي انه نفس التظليل المتوفر في السوق بمعنى أن الناس معتقدة أن هذا التظليل ( لا يستطيع ) أي شخص تركيبه !! بل أنه يحتاج إلى شركة متخصصة ، لذلك أتمنى منك أن تغير هذا التفكير عن هذا النوع من التظليل ، فكما قلت لا يفرق في تركيبه على السيارة عن أي تظليل آخر

صعوبة التركيب :

تعتمد عليك و على فهمك ، وبالدرجة الأولى على مهارتك بالعمل اليدوي بدون شك ! الصعوبة في التركيب تكمن في الجام الخلفية + الأمامية إن اردت تظليلها ، والسبب يرجع إلى ( التقوّس ) الموجود في هذي الجامات بشكل كبير ، ولذلك تحتاج إلى مسدس حراري او يمكن تعويضه بسشوار لكي تتم تسوية التظليل و مطابقته للجامات قبل البدأ في تركيبه مثل هذا المقطع ( مع ملاحظة ) أن التظليل سيأتي إليك مقصوص جاهز لو قمت بطلبه في الموضوع الذي ذكرته في الأعلى ، فكل ما تحتاجه هو المسدس الحراري لتسوية التظليل و بعد ذلك يتم تركيبه من داخل السيارة وليس كما يعتقد البعض أن التركيب يكون من الخارج !!

بقية الجامات ( قد ) تحتاج إلى المسدس الحراري في اسفل الجام و لكن بالنسبة لسيارتي لم يحتاج الأمر لذلك ، وكنت اتصور أن الجام الخلفية ايضا لسيارتي لا تحتاج إلى المسدس الحراري ولكن كان في الجام تقوّس بسيط أدى إلى بروز بعض الخطوط البسيطة لأني لم استخدم الحرارة في تمديد التظليل ، الوضع بالنسبة للجام الخلفية يمشي الحال ولكني انوي طلب القطعة الخلفية لوحدها من جديد و تركيبها بشكل أفضل في الأيام القادمة بإستخدام المسدس الحراري ، عدا ذلك فإن بقية التظليل تم تركيبه على حسب الأصول و كما أتمنى

يبقى الآن الإنتظار لمدة يومين او ثلاثة يفضل عدم فتح الشبابيك او غسل السيارة حتى يلصق التظليل بشكل جيد ، ويجب إيقاف السيارة في الشمس للتسريع من تبخير أي فقاعات قد تكون متواجدة

و إليكم بعض الصور للتركيب و الشكل النهائي :

 

الخلاصة للموضوع و تجربتي للتركيب :

ارجع و أقول أنه  ( مجرد تظليل ) لا يوجد في تركيبه شيء !! يمكنك أن تركبه بنفسك كما فعلت أنا ، أو إن أحببت يمكنك الذهاب إلى أي محل زينة سيارت ليقوم بتركيبه لك ، إن أحببت يمكنك طلب رول كامل لك و لأصدقائك أو سيارات البيت ، فإن بثمن رول كامل و الذي يكفي لغاية 6 سيارات فإن سعر شرائه و شحنه لبلدك لا يصل لسعر تركيب سيارة واحدة عند الشركات التي تبيع هذا المنتج لدينا مع الأسف ! مع الحذر في حجم و قياس الرول الذي تنوي شرائه

أنا راضي جدا من التركيب الذي عملته لسيارتي على الرغم من أنها أول تجربة في هذا المجال ، عرفت مكمن الخطأ في عدم إمتلاك مسدس حراري ، وسيتم تلافي هذي الخطأ في المستقبل في حال نويت عمل تظليل بنفسي ، من يعلم قد يكون مشروع التقاعد هاهاي

بخصوص الطلب للقطع المقصوصة كما فعلت والمسمى Pre Cut Tint فإنها بالفعل مقصوصة بإحتراف و مطابقة تماما لحجم الجامات و بأدق التفاصيل مثل قص مكان تواجد الوايرات الكهربائية لعازل الضباب في الجام الخلفي او أي شيء آخر متواجد على الجام

بخصوص الدرجة التي اخترتها للتظليل وهي 35٪ فإنها مناسبة جدا و الوضوح في الليل كان رائع جدا لأني كنت متخوف من هذي المسألة ، فبعد الإنتهاء من التظليل ذهبت في رحلة بسيطة لتجربة الرؤية أثناء القيادة ، طبعا لو تم طلب تظليل 40 – 50 في المية أعتقد أن الأمر سيكون جدا مناسب و لتلافي مشاكل المخالفات ، و تم الذهاب في رحلة نهارية صباح اليوم بعد أخذ الأبناء إلى المدرسة ، و الرؤية أيضا مبهرة و اللون جميل جدا و أنا اجلس خلف مقود السيارة ، كل شيء اشاهده واضح وليس كما يحدث في التظليل التجاري من تشوه في الرؤية !

ماذا لو تم مخالفتي بسبب هذا التظليل ؟ سأقوم بنزعه بدون أي حسافة تذكر ، فما تم توفيره من مال عند شراء هذا المنتج لا أريد دفعه للمرور صح ؟

وضعت لكم تجربتي و إن شاء الله تكون تجربة مفيدة لمن يتسائل أو متخوف من ( بُعبع ) التظليل الحراري ، فقد زال هذا الرعب الآن بتصوري أليس كذلك؟

78 تعليق

  1. شغلك مضبوط يابوناصر .. وفعلاً فتحت باب مزعج للشركات النصابة

    الحين يبيلك رنقات “24 وتطيح السيارة وساوند سستم وتكتمل الفرحه ههههههههه

  2. ضربة معلم يابوناصر

    ومشروع التقاعد اذا تبي شريك حاضرين هههه

    ماشاء الله شغلك مضبوط متى نطلع نتغدى بالسياره عشان نشوف فعلا يعزل الحراره ولا لا 🙂

    ع البركه

    • يبارك بعمرك
      ابشر خل ينشف التظليل و اغسل السيارة و نروح نقز بعز القايلة بعد شتبي ههه

  3. تجربة حلوه يعطيك العافية

  4. ماشاءالله
    خوش شي
    ودي اغيّم سيارتي بس للاسف الوالد ما يرضى :$

  5. اخوي ممكن تعطينا الموقع الي طلبت من التغيم وشلون ابلغهم اني ابي مقصوص لسياره معينه

    • في الموضوع السابق كامل التفاصيل وفيه ردود مفيدة تفيدك ايضا
      الرابط في اول الموضوع فوق

  6. اخوي ياليت تحط الموقع الي تطلب منه وجم السعر اهني بالكويت و الفرق بينه وبينه وبين الطلبية؟

    وصرااحه انا ماعرف اطلب من الانترنت كلش ابي مركز سلطان بجم ياخذ اذا طلبة هذي الطلبية مع العلم سيارتي كابرس؟

    • في اول الموضوع فيه رابط الموضوع السابق وفيه كل شيء يفيدك مع ردود لنفس التساؤلات و أكثر
      مافهمت عليك !! بخصوص مركز سلطان ؟

  7. السلام عليكم

    الله يعطيك العافيه

    الله يفتحها عليك مثل ما فتحتها علينا

    شكراً جزيلاً

  8. السلام عليكم

    الله يعطيك العافيه

    الله يفتحها عليك مثل ما فتحتها علينا

  9. مشكور والله يعطيك العافية..
    استفسار بسيط، ذكرت ان التظليل يتم من الداخل، ولكن في الفيديو كانه التظليل يتم تركيبه من الخارج !؟
    اذا ممكن توضيح الله يسلمك 🙂

    • طبعا من الداخل
      بالاول يتم وضعه من الخارج لفتح التظليل ورشه بالماء وقبلها يتم تسويته بالحرارة ان لزم الامر
      والله يعافيك

  10. ما شاء الله عليك

    الله يكثر من امثالك ويكثر مدونات مثل مدونتك

    يعطيك العافية

  11. مبروك
    جم تبي علشان تركب التظليل اللي عندي 🙂 ؟؟؟

    هههههه

    أتغشمر وعليك بالف مليون عافية 🙂

    • اخذ موعد مسبق ههه
      موفق خير فرانكوم باشا
      بلغنا بتجربتك اذا خلصت
      تحياتي

      • حبيبي 🙂 ههههه
        ان شاءالله من عيوني والفضل يعود لك بالمقام الاول 🙂

      • علي عبدالعزيز

        لو سمحت بغيت اطلب وماعرف شلون الطريقه بالموقع ممكن تساعدني لو سمحت مع العلم لدي فيزا انترنت وعندي صندوق ارامكس
        ودمتم في دوام الصحه والعافيه 🙂

  12. مبرووك

    بس السؤال المهم

    فرق معاك بالشمس يعني شلون العزل يسوى ولا نفس التظليل العادي ؟؟

    • هلا بدر يا السمي
      والله ما قدر اعطيك الفرق لاني ماجربته الا لمدة يوم و مشوار بسيط لمدرسة عيالي فقط
      ولكن مبدأيا السيارة انا متعمد طوال فترة الصباح لغاية انتهاء المدرسة وانا تاركها تحت الشمس
      بما ان الجام الامامية غير مظللة فلم اجد فرق عند ركوب السيارة ، كانت حارة كما تعودنا على اجوائنا
      وبنفس الوقت اعتقد ان جو الكويت لو نحط اي شي ما ينفع معاه ههه الله المستعان

      • مشكور

        واذا في احد من الشباب يفيدنا بنفس هالموقع بس حق ماركة في كول v-kool

        يمدجونها حييل

  13. يامال العافيه ابو ناصر

    ولكن ماراسلت الشركة بخصوص اسعار الوكالة عندكم .؟

    واذا راسلتهم وافنا بآخر التفاصيل لاهنت

    • الله يعافيك
      نعم راسلتهم والله ، ولكن لم يردوا علي لغاية الان
      استنتاجي انهم لا يريدون خسارة موزعهم في الكويت لانه لاقينا ويصرف بضاعته علينا
      بدون شك اذا ردوا علي راح ابلغكم
      لاتقصر من صوبك وراسلهم انت بعد
      تحياتي

  14. الله يجزاك خير .
    والله كنت اليوم بروح اركب تظليل بس يوم شفت فرق السعر تعجبيت !
    قررت أشتري التظليل من الموقع , وأروح للوكيل يركبه لي 🙂

    إذا بشتري التظليل من الموقع وأركبه عند الوكيل بكلف تقريبا 2500 ريال
    بس إذا شريته من الموقع وركبته عند الوكيل بكلف تقريبا 1000 ريال

    فرق السعر 1000ريال !

  15. يمين بالله انك اصلي يا الهورنت

    موضوع يبرد القلب

  16. احمد العوضي

    مبروك هونت تستاهل كل خير انت علمتنا اشلون نطلب من الموقع وانا انشالله يوصل الرول مالي خلال يومين بأذن الله وانا طلبت Air blue لان احب العازل يكون شفاف تماما وطبعا هاذا كله من افادتك لنا وقواك الله

    وبالعافيه والف مبرووك انشالله ^_^

    • الله يقويك اخوي احمد
      وزين ما اخترت تراه خوش تغيم و لونه ممتاز
      بالمبارك وموفق خير

  17. جزاك الله خير يابوناصر وعساك على القوه
    وانا بانتظار وصول طلبي وطلب صاحبي ان شاء الله خلال هذا الاسبوع …
    مع العلم ان صاحبي يبي يركبه في محل الزينه وانا متردد لان لي سوابق فاشله مع تجارب سابقه ولكن مختله عن هذه التجربه …
    بس انا مااذكر ان محلات الزينه يستخدمون مسدس حراري لاني في السابق كنت اركب التظليل العادي !!

    • بخصوص عدم استخدام المحلات للمسدس الحراري لأنهم مايبون يعورون راسهم ، شغل قص بالموس و جلد ( من برا ) للجام الخلفية بالذات
      دور لك محل يملك مسدس حراري و فاهم شغله
      تحياتي

  18. صارلي اسبوع انطر هالموضوع يعطيك العافية هورنت
    بس ياريت تقولنا بعد التجربة اذا حسيت بفرق يعزل الحرارة ولا لا ؟؟

    على فكرة انا خلاص اعلنت مقاطعتي لمدونتك قلتلك علمني شلون اشتري رول حق سيارة وحدا ولا رديت علي لاني ما لقيت نوع سيارتي الكابرس :d

    • هلا اخوي فهد
      الفرق بسيط والله مو ذاك الزود الي تتوقعه ، ويمكن جو الكويت ما ينفع معاه إلا صبة خرسانية يمكن يحجب الحرارة ههه

      بخصوص الموقع هذا او غيره والله اعلم ماعندهم مقصوص للكابرس ( الشكل الجديد ) لسبب واحد إن هذا الموديل ما نزل في امريكا

      الحل إنك تطلب رول وتركبه

      الموقع الي انا طلبت منه حاليا يتوفر عنهم رول للنوع ( أير بلو ) اما اذا تبي الأنواع الثانية على حسب بحثي السريع متوفر في Ebay
      تحياتي

  19. الصراحه شكله مو هين
    الي حاب يجربه راح يكون متوفر للتحميل بعد جم ساعه نسخه خاصه للمطورين Windows Developer Preview
    عله هل رابط
    http://dev.windows.com/

    مايحتاج لا تسجيل ولا رسوم دفع ولا تفعيل 🙂

  20. كااك بلغلط حطيت الرد !!!

  21. مشروووع تجاري ناجح يا بو ناصر …. فكر فيه و الله ذهب 🙂

  22. اخوي انا شريت اير ابلو
    الصراحه فرق معاي وحتى التكييف فرق معاي واااايد

    بس الوهقه بالتركيب
    قطيتها عند محل
    قالي التركيب 30 دينار طبعا مثل الكل قطيت سيارتي وخذيتها تالي خرب علي التظليل كله هوا
    وموغاسل الجامات قبل لا يركب وظيق خلقي كله نقط التظليل
    ويوم قتله ليش سويت جذي قالي العامل التخصص صارت عنده ظروف وخليت هندي يكمل الشغل
    واذا تبي خلاص اطلب واحد يديد وانا ادفع افلوسه الحبيب يوم قتله سعر التظليل 90 دينار بلع ريجه قال حسبالي بس 30 بالكثير والله مشكله هل السوريين

    الزبده شباب الي مجربله محل يظبط التظليل خل يدلينا عليه بارك الله فيكم
    واذا صاحب الموضوع يركبه بالبيت عندي انا مستعد اتعامل معاك + لي الشرف

    • الي طلب الايربلو يريد يعلمنا اذا يكفي السياره كامله مع الجام الامامي والخلفي
      افكر اطلبه بس خايف ما يكفي سيارتي (بليزر)
      وهل لونه يخفف الشمس ولا حيل شفاف !!

      • قيس ارتفاع جامات سيارتك و قارنها بالموجود قبل الشراء في حال تريد شراء رول كامل للسيارة ، ونعم يكفي سيارة كاملة اي كان نوعها
        يعتبر الأير بلو خفيف التغيم جدا لأنه يصل الى 78٪
        وعلى الرغم من شفافيته إلا ان عزل الحرارة فيه يعتبر الأفضل
        تحياتي

    • يالغالي انا ركبت وعنوان المحل بمشاركتي الاخيره
      خمس عمال يشتغلون وايضا عندهم مسدس حراري يعني شغل محترفين وقبلي صاحبي ركب عندهم وشاف واحد جايب التظليل ويبي يركب عندهم
      يعني متمرسين بالشغله

  23. مبروك بس ليش ماركبت الجامه الاماميه؟

    التظليل الحراري لازم يكون لكل الجامات .. هذا كلام العامل بـV-Cool

    انتا حاط التظليل الحراري على كــل الجامات؟

    تظليل الـVcool حسب ما شفتهم يحطونه من برا ..؟ بس مو متأكد

    تقول الحراره ما افرقت معاك؟.. ما فكرت لحظه ان الموقع غشك وباعلك تظليل تجاري؟!

    إذا الحراره ما افرقت معاك تنصحني اطلب المنتج من برا ولا استمر على التظليل التجاري والخام؟ تقول الحراره ما افرقت معاك!!

    اذا خالفوك المرور هل راح تنزع التظليل ومــا راح تركبه مره ثانيه ؟!

    • إن شاء الله راح اطلب من جديد تظليل ( رول ) من نوع اير بلو للجام الأمامية
      لم اجرب V-cool ولكن الكثير يمدحها هنا في الكويت
      ما قلت الا الصحيح بخصوص الفرق في الحرارة ، بحكم جونا يابو حمد ما ينفع معاه لا تظليل حراري ولا غيره
      انت الي تقرر اذا تشتري تظليل حراري او تتم على الباقات
      قلت اذا بدأت المخالفات تسبب لي مشكلة راح اشيل التظليل خير شر
      تحياتي

  24. سعد العنزي

    شباب في محل بالري خلف الافنيوز يركب لومار ……. شكله كويس
    يقولون وايد زين و سعر زين
    المشكله اغلب السيارات فيالكويت مو مجوده بالسايت

    • شنو نوع سيارتك
      لاني طلبت يوكن ٢٠١٠ ولكزس ٢٠٠٤
      ولاحظة ان اغلب السيارات موجوده

  25. شباب انا امركب اير بلو من الموقع وركبته على سيارتي

    1-شفاف وكأنك مو حاطه بالاساس
    2-يخلي الجامه فيها لمعه جنك غاسل السياره
    3-في زروقه غير ملحوظه
    4-نعم يسوي شغل التظليل من ناحيه
    راح تحسون فرق في المكيف
    منع الحراره ليس بشكل كامل والسبب هو
    ان الحرار تدخل بشكل غير مباشر من بدي السياره يعني من الحديد الباب وسقف السياره
    5-وانت طالع تتمشى بالشمس راح تحوشك الشمس مجرد ليت
    يعني حراره مافي والسبب انه شفاف يعني البس نظاره ووضعك بالسليم
    واي سؤال انا حاظر

    • بس سؤال :
      طلبت رول واحد وكفى السياره كلها ؟ ووش نوع السياره ؟
      وركبته من بره ولا من داخل ؟؟

      • راجع الموضوع السابق فيه الاجابة + ردود على استفسارات اخرى
        الرابط في الاعلى اول الموضوع
        تحياتي

  26. تم التركيب
    عنوان المحل الشويخ الصناعيه شارع الزينه
    الوصف
    وانت داخل من شارع الزينه
    ثاني لفه على اليمين
    بعدين ثاني تقاطع يكون المحل على اليمين لوحه صفراء واضحه
    اسم المحل بروفيشنال كول
    تليفون 50040640 ابوطلال

    تركيبهم وشغلهم محترف

    تكلفت التركيب ٢٥ دينار كويتي وبعد الخصم ٢٠

    جزاك الله خير يابوناصر وبيض الله وجهك
    اسال الله ان يقيك حر وعذاب جهنم مثل ماساعدتنا على تخفيف حر الصيف

  27. اسمحلي يابوناصر اليوم سويت لك زحمه بردودي في مدونتك
    ولان احب اعطيكم انطباعي بعد التجربه وانا توني راد من المسجد
    تركت اشعه الشمس من صوب باب السائق
    وفرق معاي الوضع ٨٠٪ بدون مبالغه
    حتى اني وضعت ايدي بمكان الشمس بعد ما بطلت الباب ولا دافي
    والكل يعرف اذا تركت سيارتك مثل ما انا سويت ماراح تقدر تلمس مكان الشمس واذا انت رجل بايعها يمكن تقاوم نص دقيقه من الحراره
    طبعا السياره من الداخل اختلفت درجه الحراره عن قبل بشكل كبير وملحوظ
    مع العلم اني كنت قبل استخدم الباغات الي على الجام
    حتى المكيف من الشويخ للبيت حاط دفع الهوا على ٢
    هذا انطباعي والله اعلم
    اسمحلي يابوناصر مره ثانيه على الزحمه الي سويته لك بمدونتك 🙂

  28. يا شباب عندي تظليل حق سيارتي الثانيه يا شباب الي يجربله محل ويطلع تظليله مظبوط 100% خل يقولنا

  29. القدوه الذي اقتدي فيه في عالم التدوين (ولا قصور في باقي المدونين)
    اكتسب الخبره من خلال تجاربك، الله يكثر من امثالك.

    طلبت التغييم CTX 30% و انشالله اليوم استلمه و اركبه بالمحل اللي قال عنه اخوي بو فهد
    ما تقصر يا بو ناصر

    • العفو اخوي القلاف واشكرك على الكلام الطيب
      ان شاء الله تركبه مثل ما تتمنى و أكثر
      ماقصر بو فهد بتجربته
      بلغنا بعد ما تنتهي من التركيب
      تحياتي

  30. السلام عليكم
    انا طلبت من موقع TINTZOOM تغييم حق الجامات الامامية CTX 50% وصلي اللي على الاجناب فقط وماعطوني التغييم الامامي في احد يعرف اشلون اطلب حق الجامة الامامية فقط؟

    • الجامه الاماميه لازم وانت تطلب تحط صح على المربع صغير بالاسفل من ناحيه اليمين
      في حال عدم وصول الطلبيه تقدر ترسل لهم اضافه الجامه الاماميه
      لانهم يتواصلون مع الزباين مو نفس بعد الشركات ما ترد على احد

      اما فيحال انه اوصلت الطلبيه نصيحتي خل الي يركبلك يحط من الي عنده وزيده على الحساب 15 دينار وخلصت السالفه

  31. سامحنا على الرد المتأخر ,, لكن حالياً و بسبب السماح بنسبة 30% في الكويت فإن الموضوع هذا سيكون مرجع مهم جداً لكل من يشتري من الخارج ,, خصوصاً و أنه من ضمن النتائج الأولى في البحث على العم جوجل 🙂
    سؤالي هو: هل شعرت بالفرق في حرارة السيارة و قوة المكيف بعد تركيب العازل الحراري؟

    • الحمد لله راضي علينا قوقل :/

      نعم بعد تركيب كامل التظليل و من ضمنها الجام الامامية بنوع Blue Air 80 شفاف

      الوضع عندي في السيارة Cool جدا ولله الحمد

      تظليل ممتاز و يستحق

  32. السلام عليكم اخوي .. يعطيك الف عافية الموضوع جدا ً فادنا ..

    بغيت أسألك بعد قرار وزارة الداخلية بالتظليل ٣٠٪ .. هل النسبة اهي نفسها بالموقع ولا تختلف ؟ لانه ملاحظ انه النسب مو نفس حسبتنا .. فمادري شنو المسموح ؟

    وتتوقع لو طلبت ٣٥ بيفرق ولا بتخالف عالقانون اليديد؟

    ويعطيك الف عافية

    • وعليكم السلام ورحمة الله وبركاته

      التغيم اينما كان تحسب درجاته مثل ما شفت في الموقع

      ٣٥٪ انت في السليم وحسب القانون

      اذا تبي تكون مرتاح اكثر اخذ ٥٠٪ وهو تظليل خفيف و حلو و مايواجهك اي مشكلة مع المرور

      بالنهاية القرار لك انت الي تحدد الاختيار

  33. السلام عليكم

    اخوي هورنت للتنبيه ،،، علي ما اعتقد ان التظليل الذي طلبته هو atc او atr

    لان لا يوجد نسبه 35% في نوعيه ctx ,,, يوجد فقط 30%

    والرجاء التوضيح

    http://www.tintzoom.com/2011-Chevrolet-Tahoe-4-Door-SUV-Window-Tint-Kit-p/wtk-7338.htm

    وشكرااا

    • هلا اخوي
      وقت الطلب منهم بحسب تاريخ الموضوع كلن يتوفر عند هالموقع نسبة التظايل 35 لنوع CTX
      اذا مو متوفر الحين لنفس هالنسبة يجوز انها خلصت عنده ، اخذ 30 – 40 – 50 فهو مناسب ايضا
      تحياتي

      • شكراً أخوي هورنت علي الرد السريع

        تم مراسلة الموقع tintzoom وكان هذا الرد
        ————————————————————————-

        LLumar CTX Film is not available in a 35% VLT (Visible Light Transmission)

        CTX Film is available in the following shades: 05%, 15%, 30%, 40% & 50% VLT’s

        Thank you for your interest in the worlds finest LLumar Pre-Cut Automotive Tint Kit!

        TintZoom Team
        ——————————————————————–

        وتم أيضاً دخول موقع لومار والبحث عن ctx 35% وللأسف لم أجد

        وشكرااا

  34. عبيد الرشيدي

    مبروووووك عاااش هورنت ماشاءالله الله يهنيك فيه اقول اخوي انا صراحه توهقت بالطلب لسيارتي وسيارات الربع ابيك تساعدني لو ما عليك امر ؟

    • ابشر ..
      تواصل معاي في صفحة راسلني بالاعلى و ان شاء الله خير

      • عبيد الرشيدي

        ما قصرت يا ولد عمي ورايتك بيضه انا مشكلتي انحلت حاليا وعرفتها واذا واجهت اي مشكله ثانيه راح اراسلك على طول واعذرنا على اي ازعاج ، ويعطيك العافيه

  35. عبدالله M

    قوّاك الله هورنت و الله يعطيك الصحة و العافية ..

    حيل إستفدت الله يجزاك خير ..

    و بـ أطلب منهم إن شاءالله بـ أقرب وقت ..
    لكن حالياً عندي تساؤل بسيط :

    شنو النسبة المسموحة حالياً و إلي أقدر أطلبها من الموقع ولا يغثّوني المرور ؟!

    علماً إن السيارة تاهو LT ٢٠١٢ ..

  36. فيصل العجمي

    سلام …… انا طلبت من الموقع وركبته عند شارع الزينه …بس العزل الحراري ما فرق عن شارع الزينه بو ٧ دنانير ؟؟؟؟
    اناكنت امركب من قبل عند الوكيل و الاداء واجد افضل ؟؟؟ شكلهم الموقع الي في امريكا يبيعون نوع ثاني او شي اقل كفائ

    شنو النوع الي عندكم … وهل هو مواصفات الخليج؟؟؟

    ليش محد يرد؟