مدونات تكتب بالإنجليزي المعرب !!

هذا الموضوع يدور براسي من مدة طويلة وكنت ناوي اكتب عنه من زمان بس ترددت مرة ونسيت مرات !! ولكن الحين تذكرته وقلت لازم اكتبه قبل لا انساه كالعادة ، هو بخصوص المدونات الي تكتب بالإنجليزي المعرب والي بنظري صارت مثل قصة الغراب الي ضيع مشيته وبنفس الوقت ضيع مشية الحمامة
قبل ان ابدأ بسرد الموضوع وجب التذكير بالآتي :
كل ماتم كتابته هنا هو وجهة نظري الخاصة ، لك الحرية على ان تتفق معي من عدمه ، وبدون شك انا احترم كل شخص مهما كان ومهما فعل وهو حر في تصرفاته !! ولكن انا هنا اعطي النصيحة والرأي لا اكثر  …
كثيرة المدونات التي ظهرت مؤخرا وخصوصا الكويتية على وجه الخصوص الي اصبح كتابها من الجنسين ( رجل / امرأة ) يكتبون المواضيع فيها من نوع الكتابة ( الإنجليزي المعرب )  وهذا المثال نسخته من wikipedia وكملت عليه من عندي تأليف اي كلام فقط من اجل اعطائكم الفكرة لما اقصد وبعدها سأعلق :
By the early 1990s, Apple was developing alternative platforms to the Macintosh, such as the A/UX. Apple had also begun to experiment in providing a Mac-only online portal which they called eWorld, developed in collaboration with America Online and designed as a Mac-friendly alternative to other online services such as CompuServe, bas el shay hatha ma7ad 3arflah ela ana o cham wa7ed min elrabe3 ely kano m3ay thak el yom , kan za7ma wayed o ma 3rafna sheno nsawe
طيب !! خلوني اتخيل نفسي امريكي او اي جنسية غير عربية ، دخلت الى هذي المدونة بطريقة او بأخري ! وبدأت اقرأ في الموضوع ، وفي منتصف الموضوع ( انصدمت ) بوجود الكلام الغريب ( المعرب ) كما اشرت اليه باللون الأحمر ، فماذا ستكون ردة فعلي ؟ بكل تأكيد اول شيء سأقوله ( WTF ) لأن صاحب هذي المدونة كسر فيني وماني عارف شنو قاعد يقول !!
مثال آخر ولكن هذي المرة لشخص عربي ( قح ) مع ضم حرف القاف وتسكين حرف الحاء يا العرب الجدد !!
لنفرض انني دخلت ايضا بطريقة او بأخرى إلى هذي المدونة ولا احب الإنجليزي المعرب هذا ، واول شيء سأقوم بعمله هو محاولة فك الرموز الي تم كتابة الموضوع فيها ! فتخيلوا معي الوقت المستغرق مني لقراءة ماتم كتابته في المثال باللون الأحمر في الأعلى ؟ ومن يعرف قد اكون قرأت بعض الكلمات بشكل خاطئ وبالتالي ستصل الي المعلومة مغلوطة وبشكل غير صحيح إطلاقا
مع احترامي لأشخاص هذي المدونات الي تكتب مواضيعها بهذا الشكل ولكن من تخاطبون انتم في مواضيعكم ؟ هل هي موجهه للعرب ام للأجانب ؟ من وجهة نظري حتى سكان جرز الموز ماراح يفهمون عليكم بالمرة لان الكلام المكتوب بهذي الطريقة يمكن ان يقرأ بأكثر من شكل ومعنى من شخص الى آخر ! وبالتالي انتم بدال لا تكحلونها بتوصيل رسالة للآخرين عميتوها بالمرة ، يا إخوان انا ما اعذركم بالمرة ولا اقبل عذركم تدرون ليش ؟ لأن كان بالسابق لايوجد دعم للعربي والكيبورد كان انجليزي ! ولكن الحين الوضع تغير وحتى لو قلتوا ان كمبيوتراتكم مافيها عربي هم مالكم عذر !! في مواقع توفر لك الكيبورد العربي ، وبعدين تعال خلني اقول لك كلمة في اذنك !! انت اسمك ( Jon ) مثلا علشان تقعد تكتب لي مواضيع انجليزي ؟ ولا علشان انت خريج مدرسة انجليزية قاعد تهايط على راسنا ؟ طيب كمل مهايطك على كيف كيفك محد مانعك بالمرة وبالعكس انا اقولك زيد ( بشرط ) اكتب كله بالإنجليزي الصحيح ولا تدخل الكلام الكول مالكم في وسط المواضيع !!  والله احب المواضيع الي تحطونها في مدوناتكم ولكن اكره طريقة طرحها بسبب التصنع في الكتابة ، وانا ماقول لك اكتب بالعربي الفصيح مثل ما يقولون ، بالعكس اكتب بلهجتك العامية وخصوصا الكويتية الي اعتقد انها سهلة وحلوة وتنفهم بشكل سريع جدا ، خل عنك ( slamat ) واكتبها ( سلامات ) بشكل سلس شنو راح ينقص عندك ، حتى شوف شلون راح اكتب الكلام الي كتبته لك في المثال باللون الأحمر ( يمكن تقتنع ) بكلامي !!
بس الشيء هذا محد عرفله إلا انا وكم واحد من الربع الي كانوا معاي هذاك اليوم ، كان زحمة وايد وماعرفنا شنو نسوي
شفت الفرق ؟ شفت السهولة في توصيل الكلام والمعنى عن كلامك الإنجليزي المعرب الماصخ ، و حتى لو كاتبه بالإنجليزي الصحيح راح يكون احلى ويوصل المعلومة بشكل سريع بدال ما تخلينا نسوي مشوار علي مانفهم شنو قاعد تقول !
بالختام انا ابديت رأي والي اعتقد ان الكثير مثلي منزعجين من هالكلام المعرب ، والي يخجل من اصله وبيئته مافيه خير !!

‫37 تعليقات

  1. هذيل ما يستحون ع ويوههم .. تركوا كل لغات العالم و اخترعوا
    لهم لغة ” العربيزي ” للاسف هذه الظاهرة منتشرة في منطقة الخليج بكثرة
    و خصوصا عندنا في الامارات ..

  2. مقال سليم … فعلا شي غريب اللي صاير. مثل ما ذكرت الدعم العربي اصبح متوفر وفعلا ما عاد في داعي! في مواضيع جدا تجذبني بس ما اقدر اقراها وان قدرت وقريتها صعب اعلق عليها بنفس طريقتهم. والفكرة مو ان اللغه تشوهت او اي شي >>> مع ان منظر المقال بيطلع قبيح نوعا ما مع كمية الحروف والارقام بالكلمه الوحدة , بس الفكرة اني اقعد اتهجئ الجمله بضعف الوقت الطبيعي

    اسمحلي اضيف الرابط لبروفايلي في الفيسبوك.

  3. الله عليك .. والله جبتها من طرف لساني .. انا واحد اتنرفز لما اشوف هالسوالف .. يعني ادخل مدونه كويتيه القى الموقع كله انجليزي معرب ! … زين فهمنا انك من شباب البي بي ! خخخخخخخخ بس كافي جذي … هاذي مدونة يعني المفروض تخلي الناس تفهمك وانت تبدي عن رايك bas low takteb bhal tareqa راح نروح فيها ولو شنو كان الموضوع ما راح ناخذه بجد …

    شمنكور اخوي هورنت 🙂 بارك الله فيك ..
    مغسي :))
    اخوك وليد العازمي

  4. Ay wala shay eanarfaz
    لا لا لا بس ابي اطفركم
    انا كلش مااحب هالمعرب بس فترة اضطريت اكتب فية لاني على طول قاعدة عالايباد وخبركم توة نازل و ماكو كيبورد عربي و ماصدقت اول مانزل و ركبتة افتكيت من الانجليزي المعرب
    كنت اقول الي يكتبوا بالمعرب ناس سخيفة ماعندة سالفة بس لما اضطريت و استخدمتة صرت ادور اهم عذر يمكن مساكين نفسي ماعندهم كيبور عربي و مايبون يستخدمون برنامج الكيبورد العربي لانة حدة برنامج فاااااااشل
    (: 

  5. للاسف الحين ترجمه قوقل تترجملك اياها للانجليزي… يعني عرفو الطبخه وعلى فكره حتى الروس يستخدمون نفس مصطلحاتنا عندهم روسي مقلزن 🙂

  6. ينصر دينك
    صج بردت قلبي وعلى شغلة ان مو دارسين عربي انا بصراحة مو دارس بمدارس عربية بس تعلمت الكتابة عدل بالدوام بس مااكتب هل لغة الي كننا قبل نستخدمها ايام اي ار سي على سيرفر دال نت اكيد تذكر هل ايام بس ماكان عندنا عربي بس الحين على قولة المثل اذا حضر الماء بطل التيمم والحين العربي موجود بكل مكان

  7. صارت مثل قصة الغراب الي ضيع مشيته وبنفس الوقت ضيع مشية الحمامة

    صراحة موضوعك هذا علي الجرح ….. انا ما احب هالسالفة كلش وطايحين فيها شباب اليوم ،، مو من كبري انا من هالجيل،،بس مااحب جذي احسها سخافة زايدة واذا احد ارسل لي مسج او ايميل او حتي على ماسنجر ويكلمني جذي ما ارد علية الا plz. Write in english او اكتب بالعربي وريحني كلام الهنود ما يبنفع معاي 🙂 لوووووووووووول بس شنو اسوي زهقت منهم اشدعوه عليهم 🙂

  8. ينصر ديــنك يا حج

    عااد أنا من المدمنين على الفراره بالمدونااات

    كثير منهم مميزيين بمواضيعهم و تنسيقهم لبوستاتهم

    بس هاللغه تلوع الجبد

    أنا عن نفسي ما أحبهااا لأنها لو قريت موضوع بدوووخ أكييد و نص الكلمات بقرااها غلط

    لوووول

    على العموم

    مع ممارسة الأنترنت بعد التخرج و التوقف عن الكتابه بالقلم ” لو تعطي أي واحد منا قلم و تقول له ” أكتب هالفقره ” إملاء ” يعني

    بتنصدم من الأخطاء اللغويه المضحكه

    لذلك نصيحتي إنك تحاول تكتب الكلمات بدون إختصارات مع الهمزه

    كذلك باللغه الأنجليزيه تكتب الكلمات بدون إختصارات

    بهالحال بتحافظ على مخزونك الدراسي أو سلم على روحك

    أنا أتكلم على العموم مو لك ترى ” و انا معاكم ”

    :p

  9. ياااااااااااااااه كرهيلهم ذولا ، يجيبون لي الكآبه ، انا مو مثلك ازعج راسي وكيذا ، انا ساحب عليهم
    اي احد يحاول يتكلم معي باللغه هذي ، اسحب عليه ، مستحيل اني اقراه ؟!
    اقوله شنو تكتب شنو قلت ، يا اكتب انجليزي يا عربي
    يعني تقعد تحط لي لغه ثانيه من راسك ما ابي ،
    ومثل ما قلت حب هياط بسس ،
    ومثل ماقلت انتشرت انتشارهائل عندنا ، الحين يكتبون موااااضيع بالطريقه هذي ، 🙂
    مردهم يرجعون لـ الكلام العربي باذن الله 🙂
    واضن قوقل فاتحه موقع بالنسبه لـ هذي الطريقه
    تفضل هذا الشرح من مدونة قوقل العربيه
    http://www.google4arab.org/?p=107

  10. موضوعك بالصميم !
    فعلا اكره اللي مايحكي الا انجليزي معرب ويحس هالشي من عوامل التطور ! او على قولتهم لغة العصر ! /=

  11. klamk 67 w ana 22aydk .. hathe mshkela el kel 3ane mnha .. bs ent 6r7t el mshkela .. shno el7l laha ?

    هههههههههههههههههههههه
    اتغشمر معاكم :p
    بالفعل والله هذي مشكله
    والكل يعاني منها ..
    المشكله مو بس جذي
    مخك تحوشه حكه .. اذا قريت كويتي يكتب معرب .. ووراه مصري .. وبعدين اردني !!!

    ترى قوقل صار عنده ترجمه حق المعرب من سنه تقريباً
    هههههههههههههههههههههههههههه
    جرب فيه وراح تستغرب !!
    هههههههههههه

    وعطيك العافيه على الموضوع اللي ان شالله يكون لها حمله اعلاميه !!

  12. صح لسانك اخوي هورنت …..

    فعلا حطيت ايدك على الجرح …

    قد اسمعت لو ناديت حياً … ولكن لا حياة لمن تنادي

  13. اي والله انك صااادق بردت قلبي
    ماعندهم سالفه الي يكتبون بهل الطريقه لاهو عربي ولا انجليزي فاهمين الكشخه والكوول غلط اخوانا ههههههه
    الله يعطيك العاافيه وان شاء الله عاده وتنقطع

    1. هلا اخوي عبدالله ، شرهتك على الي شاف التلفزيون في رمضان !! انا اثق في رأيك اولا وادري ان الي يتم عرضه في التلفزيون عموما يرفع الضغط
      حبيب

  14. المشكله انهم يحسبون انفسهم متطورين ومثقفين لو كتبوا في هاللغه ..
    واهم مايعرفون يتكلمون عربي مثل الناس !
    ولا انجليزي مثل الناس !
    وعلى انجليزي معرب مثل الناس !
    يعني تقدر تقول (اميين) !
    والمشكله الاكبر لمن اييلك واحد يكتب في بدايه جملته عربي ونصها انجليزي واخرها انجليزي معرب !
    طيب ليش شالهدف ؟؟؟؟؟؟؟؟؟
    والمشكله الثانيه , لمن واحد يكتبك انجليزي معرب بالبدليات ؟
    عاد تعال فجج ,, يمكن حتى خبراء الشفرات بالاستخبارات مايقدرون عليه ؟
    شيىء غريب عجيب !

  15. الله ع الموضوع .. جميل جداً ..
    وبصراحة بردت حرتي فيهم ..
    والله أكره هذه اللغة الغريبة كره شديد ..
    واللي يكتب فيها أعتبره بلا هوية ..
    لا هو اللي التزم بأصله ولغته .. ولا هو اللي تكلم بلغة سنعة ..
    أتوقع والعلم عند الله أنهم ما هم فالحين في العربي ولا الانجليزي ..
    طريقة كتابتهم بايخة وماصخة وتلوع الجبد ..

    والله بعد هالمقال والردود الطيبة
    وكلمة بو ناصر “انا ما اعذركم بالمرة ولا اقبل عذركم”
    المفروض اللي يقرأها من المقلزنين
    أنه يكف عن هذه اللغة العبيطة ..
    واللي ممكن ألبس نظارة من كثر التبحلق
    في محاولة فك رموزهم .. ( يعني ما يلبس نظارة هه )

    شكراً بو ناصر ع الموضوع الجرئ ..
    ونتمنى من الإخوة نشر الموضوع حسب الاستطاعة ..

    1. عسى عمرك طويل ،، انا ماسويت إلا النصح والباقي على الله ثم فيكم في توصيل المعلومة والفكرة لهم ،،
      وكلامك صحيح في طريقة قراءة هالكلام يرفع الضغط !
      تحياتي

  16. فعلاً هذي الطريقه الي تنرفز لما تدخل مدونه وتلقاها عربي مقلزن او تتكلم مع احد بالتلفون ويكتب لك عربي مقلزن

    انا برأيي ان هالطريقه تعبر عن نقص يعاني منه الكاتب باللغه الانجليزيه لذلك يلجأ لهالطريقه لإشباع “حاجه الفشخره” اني اعرف انجليزي فقط لا غير

    الطريقه مُمله بدرجه كبيرة لكن العذر الوحيد الي من الممكن انك تطوفها وتبلعها أنك لما تكلم أحد ماعنده عربي مثل ربعنا الطلبة بالخارج او واحد من الربع جايبه له جهاز من برى وكيبورده مافي عربي مع النظام فيه عربي بس ماله خلق يكتب ويمسح

    لكن هذا مو عذر اللغه العربية بدأت تنزل بالأجهزه بشكل رسمي مع اللغات الثانيه
    يعني الحاجه الي اخترعوا العربي المقلزن فيها انتهت

    شفيها اللغه العربيه يازينها بكسره او ضمة او فتحه يختلف المعنى 360 درجه
    الله يهديهم بس

  17. فعلا وضع اليد على الجرح

    مشكلة هالمدونات ايضا انها لا تخدم نفسها ولا غيرها :

    مثلا الشخص غير العربي سيبحث في قوقل عن اي مضووع بالإنجليزي .
    والشخص العربي سيبحث بالعربي .

    طيب هل اللغة الجديدة ” العربي المقلزن ” تصلح لأن تكون كاداة بحث في موقع قوقل ؟ طبعا لا والي يبحث بهذه اللغه عبيط او مايفهم .

    أيضا : البعض يعتذر لهؤلاء المساكين بانهم تعودوا على الكيبورد ولأن البلاك بيري حفظ اماكن الدقم ملوته !! نقوله طيب الحين مع الآيفون 4 ماكو شي اسمه كيبورد ومتعود ومش عارف ايش ليش الحين حتى بعد ان تحول بعضهم الى الآيفون مازال يكتب عربي مقلزن !!؟؟

    لأنهم يعتقدون أن الشخص الي مايكتب بهاللغه هيلق أو مو كول ..

    للأسف اللغة العربية ضاعت بين ” خليلوه – وكريموه – والبلاك بيري “

    1. صدقت ابوفلان ،، والله يصلح الحال . انا وانت وغيرنا لما نوجه لهم النقد البناء يمكن يحسون ويعدلون من طريقتهم
      تحياتي

  18. للأسف الظاهره هذي انتشرت وبقووه
    بين اصدقائي ومعارفي والبلاك بيري !
    انا لست ادري هل هي يعني ( يروينا انه يعرف يكتب انجليزي )
    جذاً غباء هالشيء ورأيت مره في منتديات سوالف سوفت موضوع افتتح دردشه انجليزي معرب ! يعني إلى هذا الحد وصل فيهم ماندري بكرا نشوف منتدى او خدمة تعليم للأنجليزي المعرب
    الله يستر
    يعطيك العافيه على التدوينه
    تحياتي

    1. نعم الجيل الجديد عاجبه الطريقة ولكن صدقني مردهم بيرجعون للأصل لأنها ( هبة ) مو أكثر !!

  19. حللللللللللللللللوة الحمدلله في احد موافقني الرأي
    بصراحة انا اتجاهل اللي يرد لي بدي اللغة بصراحة اتعب و انا افكفك الحرف، ومنبهة على صاحباتي انهم يكتبولي يا عربي يا انجليزي اما كدا لأ
    و يعطيك الف الف الف عافية 🙂

  20. اييه والله انك صادق .. شي ينرفز ..

    مرات اذا كان واحد كاتب لي بهالطريقة يصكني صداع نصفي على ما افهم شنو كاتب ..

    يعني لا الي هو كتب عربي ورحمنا ، ولا الي هو مستفيد من الانجليزي ك لغة ..

    بربس هذا بربس

    1. انا من كثر ما اركز بالي يكتبونه واقعد ( افتي ) شنو كاتبين يعورني راسي واطلع ، وصدقت بالي قلته اخوي المنصوري

  21. كم اكرههم وابغضهم ، الذين يكتبون بالإنجليزي المعرب ، او ما يسمونه ” عربي مقلزن ”

    المشكله يا خوي ، ان البعض تسألهم ، يقول هؤلاء الجيل الجديد ، هذه ضريبه التطور والحداثه والعلم <_<

    الي خابره ان الشعب اذا تطور وازداد علم وثقافه تتطور لغته معاه ، إلا حنا " وهذا دليل على تخلفنا " ففرقٌ بين الحداثه والتطور … !

    وكما قال عبد الوهاب المسيري – رحمه الله -ان معايير التقدم لدينا مغلوطه ، حيث ان البعض يظن ان التقدم هو بالنسخ الثقافي لدينا بالثقافه الأخرى .

    وإليك هذه قصه قصيره ، يقول : " عندما كنت صغيرا رحتُ اعد عدد المصابيح التي توضع في مدينتي ، وكل يوم اعدها لأنني ظننت كلما زادت المصابيح فذلك بشرى خير بأننا سنتقدم ونعود لسابق عهدنا ، ولكن عندما كبرت وذات مره رأيت إحصائيه عن عدد الذين يقرؤون في مدينتي ، فصدمت فقلت وبكل أسف : لا أمل "

    ومشكور بو ناصر على فتح هذا الموضوع الذي يؤرقني 🙂

    1. اشكرك اشكرك على الإضافة الحلوة للموضوع اخوي
      والعفو طال عمرك ،، كان لازم يتم فتح الموضوع هذا مني او من غيري
      تحياتي لك